જમ્મુ કશ્મીર ચૂંટણી: પ્રથમ તબક્કાની 24 વિધાનસભા બેઠકો પર મતદાન શરૂ

જમ્મુ-કાશ્મીર વિધાનસભા ચૂંટણીના પ્રથમ તબક્કામાં આજે 7 જિલ્લાની 24 વિધાનસભા બેઠકો પર મતદાનનો પ્રારંભ થયો છે. જેમાં 23.27 લાખ મતદારોનો સમાવેશ થાય છે.વિવિધ રાજ્યોમાં રહેતા 35 હજારથી વધુ વિસ્થાપિત કાશ્મીરી પંડિતો પણ મતદાન કરી શકશે.

દિલ્હીમાં તેમના માટે 24 વિશેષ બૂથ બનાવવામાં આવ્યા છે.પ્રથમ તબક્કાની 24 બેઠકોમાંથી 8 બેઠકો જમ્મુ વિભાગની છે અને 16 બેઠકો કાશ્મીર ખીણમાં છે. મહત્તમ 7 બેઠકો અનંતનાગમાં છે અને ઓછામાં ઓછી 2 બેઠકો શોપિયાં અને રામબન જિલ્લામાં છે.ચૂંટણી પંચના જણાવ્યા અનુસાર પ્રથમ તબક્કામાં 219 ઉમેદવારો મેદાનમાં છે. જેમાં 9 મહિલા અને 92 અપક્ષ ઉમેદવારોનો સમાવેશ થાય છે. 110 ઉમેદવારો કરોડપતિ છે જ્યારે 36 સામે ફોજદારી કેસ નોંધાયેલા છે.બિજબેહરા સીટ, જે મુફ્તી પરિવારનો ગઢ હતી, તે પણ આ તબક્કામાં છે. અહીં પીડીપી ચીફ મહેબૂબા મુફ્તીની પુત્રી ઇલ્તિજા પહેલીવાર ચૂંટણી લડી રહી છે. મહેબૂબા અને તેમના પિતા મુફ્તી મોહમ્મદ સઈદ સીએમ રહી ચૂક્યા છે.