• ગુજરાતમાં વરસાદ આગમનના પડઘમ

• મુંબઈમાં વિધિવત ચોમાસાની શરૂઆત

• ગુજરાતમાં ચાતક નજરે ચોમાસાની જોવાતી રાહ

• 12 જૂન પછી ગુજરાત તરફ આગળ વધશે ચોમાસુ

• 12થી 18 જૂન સુધી વરસાદની છે આગાહી

મુંબઈમાં વરસાદની મોસમની ધમાકેદાર શરૂઆત થઇ છે,ત્યારે હવામાન વિભાગનું અનુમાન છે કે 12થી 18 જૂન સુધી પશ્ચિમી પવનો મજબૂત થતા ચોમાસુ ગુજરાત તરફ તેજીથી આગળ વધશે,અને વરસાદની સીઝનની વિધિવત શરૂઆત થશે.

આંખોમાં બેઠેલા ચાતક કહે છે મારુ ચોમાસુ ક્યાંક આસપાસ છે,આ ગીતની એક પંક્તિ હાલમાં સૌ ગુજરાતવાસીઓના માનસપટ પર ગુંજીતી હશે.કારણ કે મુંબઈવાસીઓને મેઘરાજાએ વિધિવત રીતે પધરામણી કરીને સૌને તરબોળ કરી દીધા છે,ત્યારે મુંબઈથી હવે દક્ષિણ ગુજરાતના માર્ગે મેઘરાજા વહેલી તકે ગુજરાતમાં પણ વિધિવત રીતે આગમન કરે તેવા સંકેત વ્યક્ત કરવામાં આવ્યા છે.

હવામાન વિભાગના સૂત્રો દ્વારા જાણવા મળ્યા મુજબ હાલમાં વરસાદના આગમન અંગેના વાતાવરણમાં સંકેતો જોવા મળી રહ્યા છે. ત્યારે નર્મદા, સુરત, તાપી, ડાંગ, નવસારી, વલસાડ, દમણ અને દાદરા નગર હવેલીમાં હળવો વરસાદ પાડવાની સંભાવના વ્યક્ત કરવામાં આવી છે. આ ઉપરાંત, દક્ષિણ સૌરાષ્ટ્રના રાજકોટ, બોટાદ, જૂનાગઢ, અમરેલી, ભાવનગર, દીવ અને ગીર સોમનાથમાં પણ હળવા વરસાદની આગાહી કરવામાં આવી છે.

આગામી દિવસોની વાત કરીએ તો તારીખ 12 જૂનથી 13 અને 14 જૂન દરમિયાન ઉત્તર ગુજરાત અને પૂર્વ ગુજરાતમાં પણ હળવા વરસાદની શક્યતા વ્યક્ત કરવામાં આવી છે.હવે વહેલી તકે વરસાદની વાજતે ગાજતે પધરામણી થાય અને સૌને અસહ્ય ગરમીમાંથી છુટકારો મળે તેવી લાગણી પણ મેઘમય લોકો કરી રહ્યા છે.