અમરેલી : યુવતીનું અપહરણ કરનાર વિધર્મી યુવકની રાજુલા પોલીસે કરી ધરપકડ...

રાજુલામાંથી એક યુવતીના અપહરણનો મામલો

યુવતીનું રિક્ષામાં અપહરણ કરી વિધર્મી યુવક ફરાર

વિધર્મી યુવકને પકડવા માટે 6 ટીમો તૈનાત કરી

ગણતરીના કલાકોમાં જ વિધર્મી યુવકની ધરપકડ

યુવતીનું કાઉન્સિલ કરી તેના પરિજનોને સોંપાય

અમરેલી જિલ્લાના રાજુલાના ધોળીયા ડુંગર વિસ્તારમાંથી ગતરોજ વિધર્મી યુવક દ્વારા એક યુવતીને રિક્ષામાં અપહરણ કરીને લઈ જવાને મામલે રાજુલાવાસીઓમાં રોષ ફાટી નીકળ્યો હતો. રાજુલા પોલીસ મથકે રાત્રિના ટોળાઓ એકઠા થયા હતા, જ્યાં પોલીસે વિધર્મી યુવકને પકડવા માટે 6 ટીમો તૈનાત કરી યુવતીને ક્યાં લઇ ગયો તે અંગે જીણવટભરી રીતે તપાસ હાથ ધરી હતી, જ્યારે ટોળાને ખોટી અફવાઓમાં ન આવવા પોલીસ તંત્રએ અપીલ પણ કરી હતી.

જોકે, ગત મોડી રાત્રે જ પોલીસે 90 જેટલા સીસીટીવી ફૂટેજ ચેક કર્યા હતા. જેના આધારે બાબરા ખાતેથી પોલીસે વિધર્મી સમીર નામના યુવકની અટકાયત કરી હતી. જે બાદ યુવતીને કાઉન્સિલ કરીને તેમના પરિજનોને સોંપવામાં આવી હતી, જ્યારે વિધર્મી યુવકને રાજુલા પોલીસ મથકે લાવવામાં આવ્યો હતો. આ સાથે જ લવ જેહાદ જેવો મુદ્દો વધુ ગુંજે અને કોમી એખલાસમાં ખલેલ ન પડે તે માટે પોલીસે એલસીબી અને એસઓજી સહિતની 6 ટીમો કામે લગાડીને વિધર્મી યુવક સમીરને રાજુલા પોલીસ મથકે અટકાયત કરી હોવાની વિગતો પોલીસે આપી હતી.