ભરૂચ : આ’ખરે સ્કૂલ-વાહનોની હડતાળનો આવ્યો સુખદ અંત, વાલીઓ-વિદ્યાર્થીઓને રાહત...

3 દિવાસીય સ્કૂલ-વાહનોની હડતાળનો આવ્યો સુખદ અંત

RTO અધિકારી સાથેની બેઠક બાદ હડતાળ સમેટવામાં આવી

એસોસિએશને નિયમોના પાલન માટે 3 મહિનાની મુદત માંગી

બાળકોની સલામતી સાથે બાંધછોડ નહીં : RTO જે.જે.પટેલ

સ્કૂલ-વાહનોની હડતાળનો અંત આવતા વાલીઓને થઈ રાહત

ભરૂચ શહેર તથા જિલ્લાના વિદ્યાર્થીઓ અને વાલીઓ માટે સારા સમાચાર સામે આવ્યા છે. સ્કૂલ વાન ચાલકોની હડતાળનો આજે બીજો દિવસ હતો. બીજા દિવસે પણ હડતાલ યથાવત્ રહેતા વાલીઓ મુશ્કેલીમાં મુકાયા હતા. સવારમાં વાલીઓએ જ પોતાના બાળકોને સ્કૂલે મુકવા આવવું પડ્યું હતું. વાલીઓએ કહ્યું હતું કે, નોકરી-ધંધા મુકીને બાળકોને સ્કૂલે લેવા-મુકવા આવવું પડે છે. જેથી સરકાર અને સ્કૂલ વર્ધી એસોસિએશન વાતચીત કરીને આ અંગે સમાધાન કરી હડતાલ સમેટે તો વાલીઓને રાહત મળશે.

આ અંગે અમદાવાદ RTO કચેરીમાં સ્કૂલ વર્ધી એસોસિએશનની બેઠક મળી હતી. આ બેઠકમાં એસોસિએશન દ્વારા ફિટનેસ સર્ટિફિકેટ, વાહન પાસિંગ અને પરમિશન માટે 3 મહિનાની મુદત માંગી છે. RTO અને વર્ધી એસોસિએશન વચ્ચે ચર્ચા થઈ હતી, ત્યારે ચર્ચાના અંતે હડતાળ પૂર્ણ કરવાનો નિર્ણય લેવામાં આવ્યો છે. તો બીજી તરફ, ભરૂચના ધારાસભ્ય રમેશ મિસ્ત્રી, વાગરા ધારાસભ્ય અરુણસિંહ રણાના પ્રયાસથી ભરૂચ કલેક્ટર તેમજ ભરૂચ RTO સાથે આ મામલે બેઠક યોજાય હતી. જેમાં અમદાવાદ RTO દ્વારા સુખદ નિર્ણય લાવવા સાથે માંગણીઓ સંતોષાતા ભરૂચ જિલ્લા સ્કૂલ વાન એસોસિએશને આભારની લાગણી વ્યક્ત કરી હતી.