• નગરપાલિકાની સામાન્ય સભા યોજાઈ

• વિવિધ વિભાગના 33 કામોને મંજૂરીની મહોર

• રસ્તા,ગટર સહિતના પ્રશ્નોએ વિપક્ષે શાસક પક્ષને ઘેર્યો

• મૃત્યુ વળતર મુદ્દે સભાનો અંત તોફાની બન્યો

• સત્તાપક્ષ વિપક્ષ વચ્ચે સર્જાઈ શાબ્દિક ટપાટપી

ભરૂચ નગરપાલિકાની બજેટ પૂર્વેની સામાન્ય સભા પ્રમુખ વિભૂતિબા યાદવના અધ્યક્ષ સ્થાને મળી હતી.જેમાં વિપક્ષે રોડ, ગટર અને ડમ્પીંગ સાઈટના મુદ્દે શાસક પક્ષને ઘેરી પ્રશ્નોની પસ્તાળ પાડી હતી.તો પાલિકા ના મૃતક રોજમદાર કર્મચારીના પરિવારને સહાય અને રોજગારીના મુદ્દે અંતમાં ભારે હોબાળો મચી જવા પામ્યો હતો.

ભરૂચ નગરપાલિકાની સામાન્ય સભા પાલિકાના સભાખંડ ખાતે પ્રમુખ વિભૂતિબા યાદવની અધ્યક્ષતામાં મળી હતી.જેના પ્રારંભે પૂર્વ વડાપ્રધાન મનમોહન સિંહ,મહાકુંભમાં મોતને ભેટનાર શ્રદ્ધાળુઓ અને પાલિકાના કર્મચારી શંભુ વસાવાના મૃત્યુ અંગે શોક પ્રદર્શિત કરી બે મિનિટના મૌન પાળીને શ્રદ્ધાંજલિ પાઠવવામાં આવી હતી.જે બાદ શરૂ થયેલ સામાન્ય સભા ની કાર્યવાહી સાથે જ વિપક્ષના સભ્યોએ,ટ્રાફિક સર્કલ,રોડ, ડમ્પીંગ સાઈટ વિગેરે મુદ્દે ઉગ્ર દલીલો સાથે ચર્ચામાં ઉતરતા શાસક અને વિપક્ષના સભ્યો વચ્ચે  શાબ્દિક ચકમક ઝરી હતી.

જોકે સભાના અંતમાં પાલિકાના રોજમદાર કર્મચારી શંભુ વસાવાના પરિવારને આર્થિક સહાય અને નોકરીના મુદ્દે વિપક્ષના હેમેન્દ્ર કોઠીવાલાએ ઉઠાવતા ઉગ્ર વાતાવરણ બની જવા પામ્યું હતું,તે દરમિયાન એકાએક રાષ્ટ્રગીત સાથે સભા પૂર્ણ કરી દેવાતા શાસક પક્ષના નેતા ગણેશ કાયસ્થ અને હેમેન્દ્ર કોઠીવાલા એક બીજાની સામે આવી જતા ભારે હોબાળો મચી જતા બંને પક્ષના આગેવાનોએ મામલો થાળે પડ્યો હતો. 

બીજી બાજુ પાલિકા પ્રમુખ વિભૂતિ બા યાદવે ભરૂચના વિકાસ માટેના 33 જેટલા કામોને સામાન્ય સભામાં મંજૂર કરવા સાથે પંડિત ઓમકારનાથ હોલના ડીમોલેશન બાદ નવા બનાવવાની દરખાસ્ત કરવામાં આવી હતી,તેમજ મૃતક શંભ વસાવાના પરિવારની પડખે પાલિકા હોવાનો પણ એકરાર કરી વિપક્ષના આક્ષેપો ફગાવી દીધા હતા.