અંકલેશ્વર : પાનોલી-ખરોડ બ્રિજ નજીક ગંભીર અકસ્માત, એક યુવકનું ઘટનાસ્થળે મોત, મહિલા ઇજાગ્રસ્ત...

• પાનોલી-ખરોડ બ્રિજ નજીક સર્જાયો ગંભીર માર્ગ અકસ્માત

• માર્ગ પર ઉભેલી ટ્રકમાં પાછળથી બાઈક ભટકાતા અકસ્માત

• અકસ્માતમાં ગંભીર ઇજાના પગલે યુવકનું ઘટનાસ્થળે મોત

• ગભીર રીતે ઘાયલ મહિલાને સારવાર અર્થે ખસેડવામાં આવી

• પોલીસે અકસ્માતે મોત નોંધી આગળની કાર્યવાહી હાથ ધરી 

ભરૂચ જિલ્લાના અંકલેશ્વરના પાનોલી-ખરોડ બ્રિજ નજીક ગંભીર માર્ગ અકસ્માતમાં એક યુવકનું ઘટનાસ્થળે મોત નીપજ્યું હતું, જ્યારે ગભીર રીતે ઘાયલ મહિલાને સારવાર અર્થે હોસ્પિટલ ખસેડવામાં આવી હતી.

મળતી માહિતી અનુસાર, ભરૂચ જિલ્લાના અંકલેશ્વરના પાનોલી નજીક ખરોડ બ્રિજ વિસ્તારમાં ભયાનક માર્ગ અકસ્માત સર્જાયો હતો, જ્યાં માર્ગ પર ઉભેલી હાઇવા ટ્રકમાં પાછળથી એક બાઈક ભટકાતા અકસ્માત થયો હતો. અકસ્માત એટલો ગંભીર હતો કે, બાઈક પર સવાર યુવકનું ઘટનાસ્થળે જ કમકમાટીભર્યું મોત નીપજ્યું હતું, જ્યારે બાઇક પર સવાર યુવકની માતા ગંભીર રીતે ઇજાગ્રસ્ત થઈ હતી. ઘટનાસ્થળે હાજર લોકોએ ઇજાગ્રસ્ત મહિલાને 108 એમ્બ્યુલન્સ મારફતે હોસ્પિટલ ખસેડી હતી. તો બીજી તરફ, બનાવની જાણ થતાં જ પોલીસ કાફલો પણ તાત્કાલિક ઘટનાસ્થળે દોડી આવ્યો હતો.

પોલીસે અકસ્માતે મોત નોંધી આગળની કાર્યવાહી હાથ ધરી હતી. મૃતકની ઓળખ રાજપારડી ગામના પટેલ ફળિયામાં રહેતા યશ નિલેશભાઈ પટેલ તરીકે થઈ છે, જ્યારે આકસ્મિક ઘટનામાં આશાસ્પદ યુવકનું કરૂણ મોત નિપજતા રાજપારડી ગામમાં શોકનું મોજું ફરી વળ્યું છે.