અંકલેશ્વરના કોસમડી ગામ નજીક દર શનિવારે ભરાતા હાટ બજારના પગલે ભારે ટ્રાફિકજામના દ્રશ્યો જોવા મળી રહ્યા છે જેના કારણે અનેક વાહન ચાલકો અટવાયા હતા

અંકલેશ્વરમાં કોસમડી ગામ નજીક દર શનિવારે હાટ બજાર ભરાય છે જેમાં મોટી સંખ્યામાં લોકો ખરીદી અર્થે ઉમટી પડે છે પરંતુ આડેધડ કરવામાં આવતા પાર્કિંગ અને લારી તેમજ ગલ્લાઓ મુખ્ય માર્ગને અડીને જ ઉભા કરી દેવામાં આવતા ભારે ટ્રાફિકજામની પરિસ્થિતિનું નિર્માણ થઈ રહ્યું છે. ગતરોજ પણ ભરાયેલ હાટ બજારના પગલે મુખ્ય માર્ગ પર કલાકો સુધી ટ્રાફિકજામના દ્રશ્યો જોવા મળ્યા હતા. ટ્રાફિકજામ તેમજ ગંદકી સહિતના પ્રશ્ને અંકલેશ્વર મામલતદાર દ્વારા તમામ હાટ બજાર બંધ રાખવાના આદેશ અપાયા બાદ વેપારીઓની રજૂઆતને ધ્યાને રાખી હાટ બજાર ચાલુ રાખવા અંગે મંજૂરી આપવામાં આવી હતીમજોકે તેમાં ટ્રાફિકને અડચણ ન થાય અને સાફ-સફાઈની શરતે આ મંજૂરી આપવામાં આવી હતી પરંતુ તંત્રએ જે શરત મૂકી હતી તેનું પાલન ન થતું હોવાનું લાગી રહ્યું છે. સમી સાંજના સમયે ભારે ટ્રાફિકજામની પરિસ્થિતિ સર્જાય છે જેના કારણે અનેક વાહન ચાલકોએ મુશ્કેલી વેઠવાનો વારો આવે છે ત્યારે આ બાબતે હાટબજારના સંચાલકો અને તંત્ર કોઈ નિરાકરણ લાવે તેવી લોકો પણ માંગ કરી રહ્યા છે.