• ભરૂચ જિલ્લામાં નૈઋત્યનું ચોમાસુ બેઠું

• જિલ્લામાં સાર્વત્રિક વરસાદ વરસ્યો

• તમામ 9 તાલુકામાં વરસાદ નોંધાયો

• સૌથી વધુ હાંસોટમાં 5.52 ઇંચ વરસાદ

ભરૂચ શહેર અને જિલ્લામાં નૈઋત્યના ચોમાસાની ધમાકેદાર એન્ટ્રી થઈ છે.વિતેલા 24 કલાકમાં જિલ્લામાં સાર્વત્રિક વરસાદ વરસ્યો હતો.ભારે ઉકળાટ અને બફારા બાદ પવન સાથે વરસાદ વરસતા વાતાવરણમાં ઠંડક પ્રસરી હતી. સમગ્ર દિવસ દરમિયાન વરસાદી ઝાપટા વરસ્યા હતા.જિલ્લામાં સૌથી વધુ હાંસોટ તાલુકામાં 5.52 ઇંચ વરસાદ ખાબકયો હતો જેના પગલે જળબંબાકારની પરિસ્થિતિનું નિર્માણ થયું હતું.

બીજી તરફ ભરૂચ અને અંકલેશ્વર શહેરમાં પણ ધોધમાર વરસાદ વરસતા ઠેર ઠેર વરસાદી પાણી ભરાઈ ગયા હતા. ભરૂચ જિલ્લામાં વરસેલ વરસાદના તાલુકાવાર આંકડા પર નજર કરીએ તો જંબુસર 2.28 ઇંચ,આમોદ 1.5 ઇંચ,વાગરા 3.52 ઇંચ,ભરૂચ 2.48 ઇંચ,ઝઘડિયા 1.5 ઇંચ,અંકલેશ્વર 3.32 ઇંચ,હાંસોટ 5.52 ઇંચ,વાલિયા 1 ઇંચ,નેત્રંગમાં 12 મી.મી.વરસાદ નોંધાયો હતો.

જિલ્લામાં સરેરાશ એકથી દોઢ ઇંચ જેટલો વરસાદ નોંધાયો હતો. રાજ્યના હવામાન વિભાગ દ્વારા આગામી બે દિવસ દક્ષિણ ગુજરાત અને સૌરાષ્ટ્રમાં ભારેથી ભારે વરસાદની આગાહી કરવામાં આવી છે ત્યારે ભરૂચ જિલ્લા વહીવટી તંત્ર દ્વારા લોકોને બિનજરૂરી પ્રવાહ ટાળવા અને સાવચેત રહેવાની પણ અપીલ કરવામાં આવી છે.