• સ્વસહાય જૂથની બહેનોને રોજગારી મળી રહે તેવો અભિગમ

• નગરપાલિકા દ્વારા સ્વચ્છ ભારત મિશન અંતગર્ત આયોજન

• પાલિકા વિસ્તારમાં લોકોને સૂકા-ભીના કચરાની સમજ અપાય

• ટીમ દ્વારા ઘરે ઘરે જઈ સૂકો-ભીનો કચરો અલગ રાખવા અપીલ

• લોકોને છેલ્લા 3 મહિનાથી સમજૂતી આપી રહી મહિલાઓની ટીમ

ભરૂચમાં સ્વસહાય જૂથની બહેનોને રોજગારી મળી રહે તેવા અભિગમ સાથે નગરપાલિકા હદ વિસ્તારમાં આવતા વોર્ડમાં સૂકા અને ભીના કચરાને અલગ અલગ કરવા અંગે સમજ આપવા મહિલાઓની 16 ટીમો મેદાનમાં ઉતરી છે.

ભરૂચ નગરપાલિકામાં નેશનલ અર્બન લાઈવલી હુડ મિશન યોજના હેઠળ સ્વસહાય જૂથ ચલાવવામાં આવી રહ્યા છે, ત્યારે સ્વચ્છ ભારત મિશન અંતર્ગત ભરૂચ નગરપાલિકા હદ વિસ્તારમાં સ્વસહાય જૂથની મહિલાઓ શહેરના વિવિધ વિસ્તારોમાં ઘરે ઘરે જઈ સૂકો અને ભીનો કચરો અલગ અલગ કરવા લોકોની સમજૂતી આપી રહી છે. જે અંતર્ગત મહિલાઓની ડોર ટુ ડોરની એક્ટીવીટી માટે 16 ટીમ બનાવવામાં આવી છે. જે ટીમ પાલિકા હદ વિસ્તારના દરેક વોર્ડમાં છેલ્લા 3 મહિનાથી ઘરે ઘરે જઈ વેસ્ટ કલેક્શન તથા ભીનો કચરો અને સૂકો કચરો અલગ અલગ કરવાની સમજૂતી આપી રહી છે.

જોકે, કેટલાક શહેરીજનોને હજી પણ ભીના અને સૂકા કચરા વિશે માહિતી ન હોવાથી તેઓ તેને ભેગો કરી દેતાં હોય છે. પરંતુ વાસ્તવમાં ડોર ટુ ડોર ગાર્બેજ કલેકશનના ટેમ્પામાં સુકો અને ભીનો કચરો અલગ અલગ આપવાનો હોય છે. રોજેરોજ ચાલતી ડોર ટુ ડોર એક્ટીવીટી કરતી મહિલાઓનું મોનીટરીંગ પાલિકાના મુખ્ય અધિકારી સહિત NULM શાખા કરી રહ્યા છે. આ પ્રવૃત્તિથી મહિલાઓને રોજગારી પણ મળી રહે છે.