ભરૂચ નગર સેવા સદનના વોર્ડ નંબર 6ના ભાજપના યુવા કાઉન્સિલર વિશાલ વસાવાના મકાનની છત ધરાશાયી કાટમાળ નીચે દબાઈ જતા તેઓનું કરુણ મોત નીપજ્યું હતું જ્યારે તેમના પત્નીને ઇજા પહોંચતા સારવાર અર્થે ખસેડવામાં આવ્યા છે.

જુના ભરૂચ વિસ્તારમાં આવેલી પાયોનીયર હાઈસ્કૂલ નજીક ભરૂચ નગર સેવાસદનના વોર્ડ નંબર 6ના ભાજપના યુવા કાઉન્સિલર વિશાલ વસાવાનું મકાન આવેલું છે. ગતરાત્રીના વિશાલ વસાવા અને તેમના પત્ની મકાનમાં નિંદ્રા માણી રહ્યા હતા ત્યારે અચાનક જ મકાનની છત ધરાશયી થઈ ગઈ હતી.ધડાકાભેર છત ધરાશાયી થતા દોડધામ મચી જવા પામી હતી અને લોકોના ટોળા એકઠા થઇ ગયા હતા.આ અંગેની જાણ ફાયર વિભાગને કરવામાં આવતા તેઓ ઘટનાસ્થળે દોડી આવ્યા હતા અને કાટમાળ નીચેથી વિશાલ તેમજ તેમના પત્નીને બહાર કાઢ્યા હતા.બન્નેને સારવાર અર્થે સિવિલ હોસ્પિટલ ખસેડવામાં આવ્યા હતા. જોકે કાઉન્સિલર વિશાલ વસાવાનું ગંભીર ઇજાના પગલે મોત નીપજ્યું હતું જ્યારે તેમના પત્ની હાલ સારવાર હેઠળ છે. આ અંગેની જાણ થતાની સાથે જ ભરૂચ જિલ્લા ભારતીય જનતા પાર્ટીના પ્રમુખ પ્રકાશ મોદી સહિતના આગેવાનો પણ સિવિલ હોસ્પિટલ દોડી ગયા હતા. કાઉન્સિલર વિકાસ વિશાલ વસાવાનું આકસ્મિક રીતે મોત થતા ભાજપમાં ઘેરા શોકની લાગણી જોવા મળી રહી છે.બનાવની તપાસ ભરૂચ શહેર એ ડિવિઝન પોલીસ ચલાવી રહી છે.