• હવામાન વિભાગ દ્વારા કરવામાં આવી છે આગાહી

• આગામી 3 દિવસ ગુજરાતમાં માવઠાની આગાહી

• ગત રાત્રે રાજ્યના કેટલાક જિલ્લામાં પડ્યો વરસાદ

• પવન સાથે વીજળીના કડાકા અને કરા પણ પડ્યા

• ખેડૂતોના લલાટે ચિંતાની લકીર ઉપસી આવી

રાજ્યના હવામાન વિભાગ દ્વારા આગામી 3 દિવસ ગુજરાતમાં કમોસમી વરસાદની આગાહી કરવામાં આવી હતી, ત્યારે ગત રાત્રિના સમયે રાજ્યના કેટલાક જિલ્લાઓમાં વીજળીના કડાકા સાથે કરા પડતાં ખેડૂતોના લલાટે ચિંતાની લકીર ઉપસી આવી છે.

હવામાન વિભાગની આગાહી અનુસાર, ગુજરાતમાં કેટલાક જિલ્લાઓના વાતાવરાણમાં પલટો આવ્યો છે. જેના પગલે અમદાવાદ, બનાસકાંઠા, સાબરકાંઠા, મહેસાણા, ગાંધીનગર અને સુરેન્દ્રનગર સહિતના વિસ્તારોમાં ગાજવીજ સાથે વરસાદ પડ્યો હતો. વરસાદ સાથે ભારે પવન પણ ફૂંકાતા ભર ઉનાળે ચોમાસા જેવો માહોલ જોવા મળ્યો હતો.

અણધારી આફતથી ખેડૂતોની મુશ્કેલી વધી ગઈ છે. જ્યારે આગામી તા. 6 મે સુધી રાજ્યના અનેક જિલ્લામાં કમોસમી વરસાદની આગાહી કરવામાં આવી છે. તે જ રીતે દેવભૂમિ દ્વારકા, રાજકોટ, મોરબી, અમરેલી, સુરેન્દ્રનગર, કચ્છ, જામનગરમાં સહિતના છૂટા-છવાયા સ્થળોએ સામાન્ય વાવાઝોડાની આગાહી છે.

વીજળી સાથે કલાકમાં 5 મીમી કરતા ઓછો વરસાદ વરસી શકે છે. પવનની ઝડપ 40 કિલોમીટર પ્રતિ કલાક કરતા ઓછી ઝડપે ઓચિંતો પવન ફૂંકાવાની સંભાવના છે. તો બીજી તરફ, રાજ્યના કેટલાક જિલ્લાઓમાં વીજળીના કડાકા સાથે કરા પડતાં ખેડૂતોના લલાટે ચિંતાની લકીર ઉપસી આવી છે.