• ભાજપ મહિલા કોર્પોરેટરના પુત્રની દાદાગીરી

• પરિવાર પર કર્યો હતો હુમલો 

• લાકડી અને છરી વડે યુવાનને પહોંચાડી હતી ઇજા

• પોલીસે 10 તોફાનીઓ સામે નોંધી હતી ફરિયાદ

• છ તોફાનીઓની પોલીસે ધરપકડ કરીને શરૂ કરી તપાસ

જૂનાગઢના ખામધ્રોળ રોડ પર આવેલી રઘુવીર સોસાયટીમાં એક ગંભીર ઘટના સામે આવી હતી.વોર્ડ નંબર 2ના ભાજપના પૂર્વ કોર્પોરેટર મુન્ના અને હાલના મહિલા કોર્પોરેટરોના પતિના ત્રણ શખ્સોએ એક પરિવારના ઘરમાં ઘૂસીને જીવલેણ હુમલો કર્યો હતો.આ ઘટનામાં પોલીસે પાંચ શખ્સોની ધરપકડ કરી હતી.

જૂનાગઢના વોર્ડ નંબર -2ના ભાજપના પૂર્વ કોર્પોરેટર મુન્ના અને હાલના મહિલા કોર્પોરેટરોના પતિના સાથીઓ અનિલ, નંદો અને જયેશ ઉર્ફે ભૂરાએ જૂની અદાવતમાં રઘુવીર સોસાયટીમાં રહેતા ખતીજાબેન અને તેમના દીકરા વસીમને ગાળો બોલી હુમલો કર્યો હતો, જેનો વીડિયો પણ સોશિયલ મીડિયામાં વાઇરલ થયો હતો.

આ હુમલા બાદ વસીમભાઇ અને તેમનો મામાનો દીકરો સલીમભાઈ તાલુકા પોલીસ સ્ટેશનમાં ફરિયાદ નોંધાવી પરત ફરી રહ્યા હતા. એ દરમિયાન એક કાળા રંગની કાર આવી હતી. કારમાંથી મુન્નાનો પુત્ર સાવન અને હિતેશ છરી સાથે ઊતર્યા હતા.તેમની સાથે અન્ય 10 જેટલા માણસો હતા, જેમણે છરી અને લાકડીઓથી હુમલો કરતા સલીમભાઇની હાથની નસ કપાઈ જતા તેમને પ્રથમ સારવાર માટે જૂનાગઢ સિવિલ હોસ્પિટલ અને બાદમાં પ્રાઇવેટ હોસ્પિટલ ખસેડવામાં આવ્યા છે.આ અંગે સલીમભાઇએ હોસ્પિટલના બિછાનેથી ભાજપના કોર્પોરેટરના પુત્ર સહિત 10 લોકો સામે ફરિયાદ નોંધાવતાં પોલીસે તપાસ હાથ ધરી છે.

આ ઘટનામાં હાલમાં પોલીસે ભાજપ મહિલા કોર્પોરેટર લીરીબેન ભીંભાના પુત્રની ધરપકડ સહિત છ તોફાનીઓની પોલીસે ધપરકડ કરી હતી,જ્યારે અન્ય ફરાર આરોપીઓને ઝડપી પાડવાના પોલીસે ચક્રો ગતિમાન કર્યા છે.