• દુષ્કર્મ-એટ્રોસિટીના કેસમાં આરોપી હતો પોલીસ કસ્ટડીમાં

• પોલીસ કસ્ટડી દરમિયાન આરોપીનો આત્મહત્યાનો પ્રયાસ

• એસિડ પીનાર દુષ્કર્મના આરોપીનું સારવાર દરમ્યાન મોત

• મૃતકની પત્નીએ ફરિયાદી મહિલા વિરુદ્ધ ફરિયાદ નોંધાવી

• પતિને આત્મહત્યા કરવા માટે મજબૂર કર્યો : મૃતકની પત્ની

ગીર સોમનાથ જિલ્લામાં દુષ્કર્મ અને એટ્રોસિટીના કેસમાં આરોપીએ પોલીસ કસ્ટડી દરમિયાન એસિડ પીને આત્મહત્યાનો પ્રયાસ કર્યા બાદ સારવાર દરમિયાન તેનું મોત નિપજ્યું હતું, ત્યારે મૃતકની પત્નીએ ફરિયાદી સામે કેશોદ પોલીસ મથકે ફરિયાદ નોંધાવતાં પોલીસે વધુ તપાસ હાથ ધરી છે.

જુનાગઢ જિલ્લાના કેશોદમાં એક ચકચારીભર્યા કિસ્સામાં દુષ્કર્મના આરોપી અમાર જીકાણીએ પોલીસ કસ્ટડી દરમિયાન એસિડ પીને આત્મહત્યાનો પ્રયાસ કર્યો હતો, જેમાં તેનું મોત નિપજ્યું છે. મૃતક અમાર જીકાણીની પત્નીએ કેશોદ પોલીસ સ્ટેશનમાં ફરિયાદ નોંધાવી છે કે, કોડીનારના રહેવાસી સપના સોલંકી સાથે તેના પતિને છેલ્લા 4 વર્ષથી પ્રેમ સંબંધ હતો.

ફરિયાદ મુજબ, સપના સોલંકી અનુસૂચિત જાતિની હોવાનું જણાવી અમાર જીકાણીને તેની સાથે સંબંધ રાખવા માટે દબાણ કરતી હતી, જ્યારે તેમણે સંબંધ રાખવાની ના પાડી, ત્યારે સપના સોલંકીએ 22 જાન્યુઆરી, 2025ના રોજ પ્રભાસ પાટણ પોલીસ સ્ટેશનમાં દુષ્કર્મ અને જીવલેણ ધમકીની ફરિયાદ નોંધાવી હતી. ગીર સોમનાથ એલસીબી પોલીસે 23 જાન્યુઆરીએ અમાર જીકાણીને અમદાવાદથી પકડ્યો હતો.

જે બાદ વેરાવળ લઈ જતી વખતે કેશોદ નજીક સોમનાથ હોટલ પાસે શૌચાલયમાં આરોપીએ એસિડ પી લીધું હતું. જેથી તેને તાત્કાલિક સારવાર અર્થે હોસ્પિટલ લઈ જવામાં આવ્યો હતો. પરંતુ તેનું મોત નીપજ્યું હતું. મૃતકની પત્નીના આરોપ મુજબ, સપના સોલંકી તેના પતિને પત્ની અને બાળકને છોડીને તેની સાથે રહેવા માટે સતત દબાણ કરતી હતી.

જેના કારણે તેઓ માનસિક તણાવમાં રહેતા હતા. આ તણાવના કારણે અમાર જીકાણીએ આત્મહત્યા કરી હોવાથી સપના સોલંકી વિરુદ્ધ કાનૂની કાર્યવાહી કરવાની માંગ સાથે મૃતકની પત્નીએ કેશોદ પોલીસ મથકે ફરિયાદી સામે જ ફરિયાદ નોંધાવી છે.