જૂનાગઢ : રાજ્યના લિસ્ટેડ બુટલેગર ધીરેન કારિયાના પુત્ર અને એક વેપારીની ધરપકડ,1001 એક્ટીવેટેડ બોગસ સીમકાર્ડનો જથ્થો જપ્ત

• લિસ્ટેડ બુટલેગર સામે ગુજસીટોકનો મામલો

• ધીરેન કારિયા પોલીસ પકડથી છે દૂર

• પોલીસે તેના પુત્ર અને વેપારીની કરી ધરપકડ

• ક્રાઇમ બ્રાન્ચે 1001 એક્ટિવ સીમકાર્ડ કર્યા જપ્ત

• બોગસ સીમકાર્ડમાં રાજ્યવ્યાપી કૌભાંડની આશંકા

જૂનાગઢના ગુજસીટોક કેસમાં લિસ્ટેડ બુટલેગર ધીરેન કારિયા ફરાર છે.પરંતુ કુખ્યાત આરોપીને મદદ કરવા માટે ઉપયોગમાં લેવાના હેતુથી સંગ્રહ કરીને રાખેલા ગુજરાત બહારના 1001 એક્ટીવેટેડ બોગસ સીમકાર્ડના જથ્થા સાથે ક્રાઈમ બ્રાન્ચે રાધનપુરના એક વેપારી અને બુટલેગરના પુત્રની ધરપકડ કરી છે.

જૂનાગઢ પોલીસે કુખ્યાત બુટલેગર ધીરેન કારિયા સામે ગુજસીટોકનો ગુન્હો નોંધ્યો હતો,ત્યારથી તે પોલીસ પકડથી દૂર ભાગતો રહ્યો છે.જોકે પોલીસ તેને દબોચી લેવા માટે સતત પ્રયાસ કરી રહી છે,અને ધીરેન કારિયા સુધી પહોંચવાની પ્રથમ મહત્વની કડી પોલીસના હાથે લાગી છે.અને ચોંકાવનારી હકીકત બહાર આવી છે.ફરાર આરોપીને મદદ કરવા માટે ઉપયોગમાં લેવાના હેતુથી સંગ્રહ કરીને રાખેલા ગુજરાત બહારના 1001 એક્ટીવેટેડ બોગસ સીમકાર્ડના જથ્થા સાથે ક્રાઈમ બ્રાન્ચે રાધનપુરના એક વેપારી અને બુટલેગરના પુત્રની ધરપકડ કરી છે.

બુટલેગર ધીરેન કારીયા સામે જૂનાગઢ પોલીસે ગુજસીટોકનો ગુન્હો દાખલ કર્યો હતો અને તેને પોલીસ શોધી રહી હતી, જે તપાસમાં જૂનાગઢ એલસીબી પી.આઈ. જે.જે.પટેલને હકીકત મળી જેના આધારે બુટલેગરના પુત્ર પરમ ધીરેન કારીયાને ઝડપી લેવાયો અને એનો મોબાઈલ ચેક કરતા તેમાં રાજ્ય બહારના એક્ટીવેટેડ બોગસ સીમકાર્ડ મળી આવ્યા હતા. જેની તપાસમાં આ સીમકાર્ડ તેણે પોતાના કુટુંબી મામા સંદીપ ઉર્ફે બંટી મારફતે બહારના રાજ્યથી ધરમ ઉર્ફે ધવલ વૃંદાવન રતિલાલ મીઠીયા મારફત મેળવ્યા હતા. જે અંગે ગત 30 મેના રોજ પોલીસે બી ડિવિઝન પોલીસમાં જાણવા જોગ એન્ટ્રી કરીને વધુ તપાસ શરુ કરી હતી અને તે તપાસમાં પાટણના રાધનપુરમાં અમીપુરાના મોબાઈલના ધંધાર્થી ભરત શંકર પરમારને ત્યાં જૂનાગઢ એલસીબીએ સર્ચ કરતા અહીંથી 1001 જેટલા એક્ટીવેટેડ બોગસ સીમકાર્ડનો જથ્થો મળી આવ્યો હતો, જે પોલીસે કબજે કર્યો અને આ કેસમાં હાલ ભરત પરમાર અને ધીરેનના પુત્ર પરમ કારીયાની એલસીબીએ ધરપકડ કરીને બી ડિવીઝનના ગુન્હો નોંધાવ્યો અને આગળની તપાસ એસઓજીને સોંપવામાં આવી છે.

પોલીસે જણાવ્યું હતું કે, આ ગુન્હો અતિ ગંભીર છે, જેમાં રાજ્ય બહારના એક્ટીવેટેડ બોગસ સીમકાર્ડનો જથ્થો મળી આવ્યો છે અને બોગસ સીમકાર્ડનો રાજ્યવ્યાપી રેકેટ પણ ચાલતું હોવાની આશંકાને લઈને સમગ્ર મામલાની તપાસ હવે જૂનાગઢ એસઓજી કરી રહી છે. ત્યારે આ કેસમાં ધીરેન કારીયાની પત્ની નિશાબેન કારીયા સાથે ભરથ અંબુલા, ચંદનકુમાર મોહંતી, સંદીપ ઉર્ફે બંટી જગદીશ અઢીયાની પણ સંડોવણી સામે આવતા તેની પણ પોલીસ અટકાયત કરશે.ઉલ્લેખનીય છે કે ધીરેન કારીયાની પત્ની નિશાબેન જૂનાગઢ મનપામાં ભાજપના પૂર્વ નગરસેવિકા તરીકે ચૂંટાયા હતા.