ગિફ્ટ સિટીથી 32 કિમી દૂર લિહોડા ગામે દેશી દારૂ પીધા બાદ 2 લોકોના મોત નિપજતા લઠ્ઠાકાંડની આશંકા

ગાંધીનગરના લીહોડા ગામે શંકાસ્પદ ઝેરી પીણું પીતા બે લોકોના મોત બાદ કથિત લઠ્ઠાકાંડને લઈ ચર્ચા જાગી હતી. જોકે પ્રાથમિક વિગતો મુજબ ઝેરી પીણાના FSL રિપોર્ટમાં મિથેનોલ ન હોવાનું સામે આવ્યું છે

ગાંધીનગર જિલ્લાના લીહોડા ગામેથી ચોંકવાનાર સમાચાર સામે આવ્યા છે. મળતી માહિતી અનુસાર શંકાસ્પદ ઝેરી પીણું પીતા બે લોકોના મોત થયા તો શંકાસ્પદ ઝેરી પીણું પીતા 4 લોકોની સ્થિતિ ગંભીર છે. જેને લઈ આ ચારેય લોકોને સારવાર અર્થે ગાંધીનગર સિવિલ હોસ્પિટલ ખસેડાયા છે. આ તરફ હવે ઝેરી પીણાનો FSL રિપોર્ટ સામે આવ્યો છે. આ રિપોર્ટ મુજબ ઝેરી પીણામાં મિથેનોલ ન હોવાનો ખુલાસો થતાં હવે લઠ્ઠાકાંડ ન હોવાનો પ્રાથમિક અહેવાલ સામે આવ્યો છે.

આ તરફ આ બંને લોકોનું દારૂનું વધુ પડતું સેવન અને અન્ય બીમારીના લીધે મૃત્યુ થયાની આશંકા સેવાઇ રહી છે. આ તરફ હવે પોલીસે સમગ્ર મામલાને ગંભીરતાથી લઈને સર્ચ ઓપરેશન હાથ ધર્યું છે. આ સાથે 108 સેવાને લીહોડા ગામે સ્ટેન્ડબાય રખાઈ છે તો રેન્જ આઈજી અને જિલ્લા પોલીસ વડાએ ગામની મુલાકાત લીધી હતી.