સરદાર સરોવર નર્મદા ડેમમાં પાણીની આવકમાં વધારો

નર્મદા ડેમની સપાટીમાં 24 કલાકમાં ધરખમ વધારો થયો

નવા નીરની આવકથી નર્મદા નદી છલોછલ છલકાતી થઈ

ઘેરા વાદળો વચ્ચે નર્મદા ડેમ ખાતે મનમોહક દ્રશ્યો સર્જાયા

આહ્લાદક અને મનમોહક દ્રશ્યો નિહાળવા પ્રવાસીઓનો ધસારો

નર્મદા જિલ્લા સ્થિત સરદાર સરોવર નર્મદા ડેમમાં પાણીની સપાટીમાં 24 કલાકમાં ધરખમ વધારો નોંધાયો છે. તો બીજી તરફ, પાવન સલીલા માઁ નર્મદા નવા નીરથી છલોછલ અને છલકાતી હોય અને ઘેરા વાદળો વચ્ચે મનમોહક દ્રશ્યો નિહાળવા પ્રવાસીઓ આકર્ષાય રહ્યા છે.

ઉપરવાસમાંથી 2,39,358 ક્યુસેક પાણીની આવક હજુ પણ ચાલુ છે. જેના કારણે વહેલી સવારે 6 કલાકે નર્મદા ડેમ તંત્ર દ્વારા 5 ગેટ ખોલવામાં આવ્યા, અને બાદમાં પાણી આવક વધતાં બીજા 9 ગેટ ખોલવામાં આવ્યા છે, અને હજુ પણ ઉપરવાસમાંથી પાણીની આવક ચાલુ હોય જેથી વધુ 3થી 4 ગેટ ખોલવામાં આવશે. છેલ્લા 24 કલાકમાં પાણીની સપાટી 3.5 મીટર વધી છે.

સરદાર સરોવર નર્મદા ડેમમાં પાણીની સપાટી 134.80 મીટર પર પહોંચી ગઈ હતી. જોકે, આ પાણીની આવક પ્રમાણે ગેટ વધારવા-ઘટાડવા નર્મદા તંત્ર દ્વારા નક્કી કરવામાં આવ્યું છે. તો બીજી તરફ, રિવરબેડ પાવર હાઉસના 6 ટર્બાઇનો ધમધમી ઉઠ્યા છે. પાવર હાઉસમાંથી 43,755 ક્યુસેક પાણી નદીમાં છોડાઈ રહ્યું છે. કેનાલ હેડ પાવર હાઉસમાંથી 14,097 ક્યુસેક પાણી છોડાઈ રહ્યું છે.

એટલે નર્મદા નદીમાં 53,955 ક્યુસેક પાણી છોડવામાં આવે છે, જ્યારે દરવાજા ખોલી 1.50 લાખ ક્યુસેક પાણી છોડવામાં આવી રહ્યું છે. નદીમાં પાણી છોડવામાં આવતા ગરુડેશ્વર વિયર ડેમ ઓવરફ્લો થયો છે. નર્મદા છલોછલ અને છલકાતી હોય એવા નયનરમ્ય દ્રશ્યો, ઘેરા વાદળો વચ્ચે સુંદર મનમોહક દ્રશ્યો સર્જાયા છે. જેને જોવા પ્રવાસીઓ આકર્ષાય છે.

એક બાજુ નર્મદા બંધમાંથી ધરસમસતા પાણીના પ્રવાહ વહેતા ધોધને નિહાળવા પ્રવાસીઓ મોટી સંખ્યામાં આવી રહ્યા છે. જે આહલાદક દ્રશ્ય જોઈ પ્રવાસીઓ પણ મંત્રમુગ્ધ થતા જોવા મળે છે.