નવસારી : મકાન બહાર રહેલા બુટ-ચંપલની અજાણ્યા ઈસમે કરી ચોરી, તસ્કરની કરતૂત CCTVમાં કેદ...

નવસારી શહેરની પુષ્પમ વિહાર સોસાયટીમાં અજાણ્યા ઈસમ મકાન બહાર રહેલા બુટ-ચંપલની ચોરી કરતાં CCTV કેમેરામાં કેદ થયો હતો.

આપણે જોઈએ છે તેમ, મંદિર પરિસરમાંથી લોકોના બુટ-ચંપલની ચોરી થતી હોય છે, જેને એક સામાન્ય વાત માનવામાં આવે છે. પરંતુ પોતાના મકાન બહારથી જ બુટ-ચંપલની ચોરી થવી તે વાત કેમ માનવી..!, ત્યારે આવો જ એક કિસ્સો નવસારી શહેરમાંથી સામે આવ્યો છે. નવસારી શહેરના જયશંકર પાર્ટી પ્લોટ નજીક આવેલ પુષ્પમ વિહાર સોસાયટીમાં ગત રોજ બપોરના સમયે એક અજાણ્યા ઈસમે પ્રવેશ કર્યો હતો. આ ઈસમે સોસાયટીમાં આવેલ કેરવ એપાર્ટમેન્ટમાં મકાન બહાર રહેલા બુટ-ચંપલની ચોરી કરી હતી, જ્યાં 4 માળાના અપાર્ટમેન્ટમાંથી અજાણ્યો ઈસમ મકાનની બહાર રહેલા બુટ-ચંપલ લઈને ફરાર થઈ જાય છે. CCTV ફૂટેજમાં સ્પષ્ટ જોઈ શકાય છે કે, કેવી રીતે અજાણ્યો ઈસમ લોકોના બુટ-ચંપલથી પોતાના પાસે રહેલો થેલો ભરી રહ્યો છે. સોસાયટીના રહીશોએ આ મામલે નવસારી ગ્રામ્ય પોલીસ મથકે અરજી આપી બુટ-ચંપલની ચોરી કરનાર અજાણ્યા તસ્કરને વહેલી તકે ઝડપી લેવામાં આવે તેવી માંગ કરી છે.