ગુજરાતભરમાં અચાનક વાતાવરણમાં પલટો,વિવિધ જિલ્લામાં ગાજવીજ સાથે વરસાદી માહોલ જામ્યો

ગુજરાત રાજ્યમાં અચાનક વાતાવરણમાં પલટો આવ્યો છે,જૂનાગઢ,અમરેલી,વલસાડ,ભરૂચ સહિતના જિલ્લાઓમાં વીજળીના કડાકા ભડાકા સાથે વરસાદ વરસ્યો હતો.

ગુજરાત રાજ્યમાં નવરાત્રી પર્વના અંતિમ દિવસોમાં વરસાદ વરસ્યો હતો,ત્યાર બાદ લોકોએ ગરમીનો સામનો કર્યો હતો,આજરોજ સવારથી જ સૂરજદાદા ગરમી વરસાવી રહ્યા હતા,જો કે બપોરના સમયે મેઘરાજાએ અચાનક બઘડાટી બોલાવી હતી,અને વીજળીના કડાકા ભડાકા સાથે વરસાદ વરસ્યો હતો,જોકે વાતાવરણમાં અચાનક આવેલા બદલાવે ખેડૂતોની ચિંતામાં વધારો કર્યો હતો.હવામાન વિભાગની આગાહીના પગલે જૂનાગઢ જિલ્લાના મેંદરડા,માલણક,સાસણ ગીર સહિતના વિસ્તારોમાં બપોર બાદ ધોધમાર વરસાદ શરૂ થયો હતો.વરસાદને કારણે રસ્તા ઉપર પાણી ફરી વળ્યા હતા.જ્યારે વાહન ચાલકોને ભારે હાલાકી નો સામનો કરવો પડ્યો હતો.એક તરફ સાસણગીર ખાતે ચાર મહિનાના લાંબા સમયગાળા બાદ આજે જંગલ સફારીનું વેકેશન ખુલ્યું છે ત્યારે વરસાદનું આગમન થતાં હાલ પર્યટકોમાં પણ ચિંતાનું મોજું ફરી વળ્યું હતું.    

તો બીજી તરફ અમરેલી જિલ્લાના સાવરકુંડલા ગ્રામ્ય પંથકમાં ધોધમાર વરસાદી ઝાપટા વરસ્યા હતા.સાવરકુંડલાના ઘનશ્યામનગર, આદસંગ, થોરડી, છાપરી, લીખાળા, વીજપડી, ડેડકડી, ભોંકરવા ગામોમાં વીજળીના કડાકા ભડાકા સાથે વરસાદ ખાબક્યો હતો.આ ઉપરાંત વલસાડ જિલ્લામાં પણ અનેક વિસ્તારમાં વરસાદી માહોલ સર્જાયો હતો.

અરબ સાગરમાં સર્જાયેલ ડિપ્રેશનને પગલે હવામાન વિભાગ દ્વારા વરસાદની આગાહી કરવામાં આવી છે.જે આગાહીને કારણે આજરોજ બપોર બાદ ભરૂચ જિલ્લાના અંકલેશ્વર અને વાલિયા પંથકમાં ધોધમાર વરસાદ ખાબક્યો હતો.વાલિયા તાલુકાના ડહેલી, સિલુડી, ઘોડા,કોંઢ સહિતના ગામોમાં વરસાદ વરસ્યો હતો.તો અંકલેશ્વર જીઆઇડીસીના વિવિધ વિસ્તારોમાં પણ વરસાદ ખાબક્યો હતો.છેલ્લા બે દિવસથી ભારે ઉકળાટ અને બફારા વચ્ચે વરસાદ પડતા જ વાતાવરણમાં ઠંડક પ્રસરી હતી.વરસાદ વરસતા જ લોકોએ બફારા વચ્ચે રાહતનો શ્વાસ લીધો હતો.જ્યારે હવામાન વિભાગ દ્વારા હજી ત્રણ દિવસ વરસાદની આગાહી કરવામાં આવી છે.