મણિપુર હિંસામાં અત્યાર સુધીમાં 54 લોકોના મોત, ઈમ્ફાલમાં સ્થિતિ સુધરી, દુકાનો અને બજારો ખુલ્યા...

મણિપુર હિંસામાં અત્યાર સુધીમાં 54 લોકોના મોત થયા છે. જોકે, હવે ધીરે ધીરે હિંસા શાંત થઈ રહી છે, અને સ્થિતિમાં સુધારો થઈ રહ્યો છે. ઈમ્ફાલ ખીણમાં દુકાનો અને બજારો ફરી ખુલી ગયા છે. લોકો ઘરોમાંથી બહાર આવી રહ્યા છે.

મણિપુરના કેટલાક જિલ્લાઓમાં આદિવાસી જૂથો દ્વારા રેલીઓ કાઢવામાં આવી હતી, જેના પગલે મણિપુરમાં ઘણી જગ્યાએ હિંસા જોવા મળી હતી. તે જ સમયે, આ હિંસામાં મૃત્યુઆંક વધીને 54 થઈ ગયો છે. જોકે, હિંસા ધીરે ધીરે શાંત થઈ રહી છે. પરંતુ રાજ્યમાં સ્થિતિ હજુ પણ તંગ છે. ઈમ્ફાલ ઘાટીમાં આજે એટલે કે, શનિવારે જનજીવન સામાન્ય થઈ ગયું., ત્યાં દુકાનો અને બજારો ફરી ખુલી ગયા છે, અને રસ્તાઓ પર વાહનો દોડવા લાગ્યા છે. હિંસાને લઈને વહીવટી તંત્ર કડક બન્યું હતું. પરિસ્થિતિને કાબૂમાં લેવા માટે ત્યાં પૂરતી સુરક્ષા વ્યવસ્થા કરવામાં આવી હતી. તમામ મુખ્ય વિસ્તારો અને રસ્તાઓ પર વધુ ટુકડીઓ અને રેપિડ એક્શન ફોર્સ અને સેન્ટ્રલ પોલીસ ફોર્સ મોકલીને સુરક્ષાની હાજરી મજબૂત કરવામાં આવી હતી. ઇમ્ફાલ શહેર અને અન્ય સ્થળોએ સવારે મોટાભાગની દુકાનો અને બજારો ખુલી ગયા હતા, અને લોકોએ શાકભાજી અને અન્ય આવશ્યક વસ્તુઓની ખરીદી કરી હતી. જોકે, મોટી સંખ્યામાં સુરક્ષા દળો ત્યાં તૈનાત હતા. મણિપુર હિંસામાં 54 મૃતકોમાંથી, 16 મૃતદેહો ચુરાચંદપુર જિલ્લા હોસ્પિટલના શબઘરમાં રાખવામાં આવ્યા છે, જ્યારે 15 મૃતદેહો ઇમ્ફાલ પૂર્વ જિલ્લામાં જવાહરલાલ નહેરુ ઇન્સ્ટિટ્યૂટ ઑફ મેડિકલ સાયન્સમાં છે. ઇમ્ફાલ પશ્ચિમ જિલ્લાના લેમ્ફેલ ખાતે પ્રાદેશિક તબીબી વિજ્ઞાન સંસ્થાનમાં 23 લોકોના મૃત્યુ નોંધાયા છે, અધિકારીએ જણાવ્યું હતું. આ દરમિયાન, શુક્રવારે રાત્રે ચુરાચંદપુર જિલ્લામાં બે અલગ-અલગ એન્કાઉન્ટરમાં 5 આતંકવાદીઓ માર્યા ગયા હતા, અને ઈન્ડિયા રિઝર્વ બટાલિયનના 2 જવાન ઘાયલ થયા હતા. ચુરાચંદપુર જિલ્લાના સૈટોન ખાતે સુરક્ષા દળો અને આતંકવાદીઓ વચ્ચે અથડામણ થઈ હતી, જેમાં 4 આતંકવાદીઓ માર્યા ગયા હતા. પોલીસે જણાવ્યું હતું કે, ટોરબુંગમાં, આતંકવાદીઓએ સુરક્ષા દળો પર ગોળીબાર કર્યો, તેમને જવાબી કાર્યવાહી કરવા માટે સંકેત આપ્યો. વધુમાં પોલીસે જણાવ્યું હતું કે, જવાબી કાર્યવાહીમાં 1 આતંકવાદી માર્યો ગયો અને 2 IRB જવાન ઘાયલ થયા. છેલ્લા 12 કલાકમાં ઇમ્ફાલ પૂર્વ અને પશ્ચિમ જિલ્લામાં આગજનીની છૂટાછવાયા બનાવો બન્યા છે. અસામાજિક તત્વોએ અફડાતફડી મચાવવાના વારંવાર પ્રયાસો કર્યા હતા, જોકે, ઘટનાઓની વિગતો ઉપલબ્ધ નથી. કેટલાક સૂત્રોએ જણાવ્યું હતું કે, સમુદાયો વચ્ચેની લડાઈમાં ઘણા લોકો માર્યા ગયા હતા અને લગભગ સો ઘાયલ થયા હતા. હિંસામાં માર્યા ગયેલા લોકોના મૃતદેહો ઇમ્ફાલ પૂર્વ અને પશ્ચિમ, ચુરાચંદપુર અને બિશેનપુર જેવા જિલ્લાઓમાંથી લાવવામાં આવ્યા હતા. ગોળી વાગવાથી ઘાયલ થયેલા ઘણા લોકોને RIMS અને જવાહરલાલ નેહરુ ઈન્સ્ટિટ્યૂટ ઓફ મેડિકલ સાયન્સમાં પણ સારવાર આપવામાં આવી રહી છે. સુરક્ષા દળોએ હિંસાગ્રસ્ત વિસ્તારોના વિવિધ લઘુમતી વિસ્તારોમાંથી તમામ સમુદાયોના નાગરિકોને સુરક્ષિત સ્થળોએ ખસેડ્યા છે. જેના કારણે રાજ્યના ચુરાચંદપુર, કાંગપોકપી, મોરેહ અને કાકચિંગ હવે સંપૂર્ણ નિયંત્રણમાં છે, અને ગઈ રાતથી કોઈ મોટી હિંસાના અહેવાલ સામે આવ્યા નથી. રાજ્યમાં સેના અને આસામ રાઈફલ્સના લગભગ 10,000 જવાનોને તૈનાત કરવામાં આવ્યા છે.