કોણ સંભાળશે દિલ્હીની સત્તા..! : અરવિંદ કેજરીવાલના રાજીનામા બાદ આજે AAP ધારાસભ્ય દળની બેઠક, CMનું નામ ફાઈનલ થશે..!

દિલ્હીના નવા સીએમ દિલ્હીના મુખ્યમંત્રી અરવિંદ કેજરીવાલ મંગળવારે સીએમ પદ પરથી રાજીનામું આપી શકે છે. તેમણે લેફ્ટનન્ટ ગવર્નરને મળવા માટે સમય માંગ્યો છે. આજે AAP ધારાસભ્ય દળની બેઠક પણ છે, જેમાં નવા મુખ્યમંત્રી અંગે નિર્ણય લેવામાં આવશે. અરવિંદ કેજરીવાલને સુપ્રીમ કોર્ટે જામીન આપી દીધા છે, તેઓ એક્સાઇઝ પોલિસી કૌભાંડ સાથે જોડાયેલા કેસમાં તિહાર જેલમાં બંધ છે.

આજે AAP ધારાસભ્ય દળની બેઠક

આજે એટલે કે, મંગળવારે દિલ્હીના નવા મુખ્યમંત્રીના નામને મંજૂરી આપવામાં આવશે. સવારે 11.30 વાગ્યે આમ આદમી પાર્ટી (AAP)ના ધારાસભ્યોની બેઠક મળશે. મુખ્યમંત્રી અરવિંદ કેજરીવાલે રવિવારે મુખ્યમંત્રી પદ છોડવાની જાહેરાત કરી હતી. તેમણે કહ્યું હતું કે, તેઓ 2 દિવસ પછી મુખ્યમંત્રી પદ પરથી રાજીનામું આપી દેશે. ધારાસભ્ય દળની બેઠક સીએમ આવાસ પર જ યોજાશે. અરવિંદ કેજરીવાલે સોમવારે લેફ્ટનન્ટ ગવર્નર વીકે સક્સેના સાથે મુલાકાતનો સમય માંગ્યો હતો. આ પછી રાજનિવાસમાં સભા માટે સાંજે 4.30 વાગ્યાનો સમય આપવામાં આવ્યો છે. આ સમયગાળા દરમિયાન સીએમ કેજરીવાલ પોતાનું રાજીનામું આપી શકે છે.

તો બીજી તરફ, હરિયાણાના જીંદમાં AAP નેતા અને રાજ્યસભાના સાંસદ સંદીપ પાઠકે કહ્યું કે, આગામી 1-2 દિવસમાં દિલ્હીના આગામી મુખ્યમંત્રીનો નિર્ણય લેવામાં આવશે. ધારાસભ્ય દળની બેઠક થશે, જેમાં એકની પસંદગી કરવામાં આવશે. તેમણે કહ્યું કે અરવિંદ કેજરીવાલ સત્તા સાથે જોડાયેલા નથી, તેમને તેમનું સન્માન સૌથી વધુ ગમે છે. અરવિંદ કેજરીવાલના સીએમ પદેથી રાજીનામું આપવાની જાહેરાત બાદ ઘણા AAP નેતાઓના નામ નવા સીએમ બનવાની રેસમાં છે. પરંતુ દિલ્હીની કમાન કોના હાથમાં આવશે તે કહેવું અત્યારે મુશ્કેલ છે. જોકે, કેટલાક નામ બહાર આવતા ચર્ચાનું બજાર ખૂબ જ ગરમ થયું છે. રાજકીય વર્તુળોમાં પણ આ નામોને લઈને અનેક ચર્ચાઓ થઈ રહી છે. આમ આદમી પાર્ટીના ઘણા નામો રેસમાં છે, જેમાં આતિશી, કૈલાશ ગેહલોત, સંજય સિંહ, સૌરભ ભારદ્વાજ અને રાઘવ ચઢ્ઢાનો સમાવેશ થાય છે. જોકે, આમ આદમી પાર્ટી નવું નામ લાવીને ચોંકાવી શકે છે. કારણ કે, આ રીતે ભારતીય જનતા પાર્ટી (BJP)એ પણ અલગ-અલગ રાજ્યોના સીએમની નિમણૂક કરીને લોકોને ચોંકાવી દીધા છે.