ભારત જોડો યાત્રા બાદ કોંગ્રેસ શરૂ કરશે નવું અભિયાન, જાણો શું છે 2023માં કોંગ્રેસની યોજના..!

કોંગ્રેસનું સંપૂર્ણ અધિવેશન ફેબ્રુઆરીમાં યોજાશે. જેનું આયોજન છત્તીસગઢની રાજધાની રાયપુરમાં કરવામાં આવશે. આ સિવાય 'ભારત જોડો યાત્રા'ની સફળતા જોઈને કોંગ્રેસ હવે એક નવું અભિયાન શરૂ કરશે. તેનો હેતુ લોકોને પાર્ટીની નીતિઓ સાથે જોડવાનો અને સરકારની ખોટી નીતિઓ વિશે માહિતગાર કરવાનો છે. આ માહિતી પાર્ટીના રાષ્ટ્રીય મહાસચિવ અને સાંસદ કેસી વેણુગોપાલે આપી હતી.

કેસી વેણુગોપાલે રવિવારે કહ્યું, 'આજે કોંગ્રેસ સ્ટીયરિંગ કમિટીની બેઠકમાં અમે બે બાબતો પર ચર્ચા કરી. પ્રથમ અમારી પાર્ટીનું પૂર્ણ સત્ર છે, જે અમે ફેબ્રુઆરીના બીજા પખવાડિયામાં યોજવાનું નક્કી કર્યું છે. આ 3 દિવસનું સત્ર હશે, જે રાયપુર (છત્તીસગઢ) ખાતે યોજાશે. કોંગ્રેસ સાંસદે વધુમાં કહ્યું, "બીજું, અમે ભારત જોડો યાત્રા માટેના ભાવિ પગલાંની સમીક્ષા કરી અને ચર્ચા કરી. અમે 26 જાન્યુઆરીથી મોટા પાયે 'હાથ સે હાથ જોડો અભિયાન' શરૂ કરવાનું નક્કી કર્યું છે. તે બે મહિના સુધી ચાલનારી લાંબી ઝુંબેશ હશે. કોંગ્રેસના સાંસદ કેસી વેણુગોપાલે પણ માહિતી આપી હતી કે, પ્રિયંકા ગાંધી વાડ્રાના નેતૃત્વમાં 2023માં 2 મહિના માટે મહિલા માર્ચ શરૂ કરવામાં આવશે. આ માર્ચ 26 જાન્યુઆરી 2023 થી 26 માર્ચ 2023 સુધી દેશના તમામ રાજ્યોની રાજધાનીમાં યોજવામાં આવશે. નોંધનીય બાબત એ છે કે રાહુલ ગાંધીની 'ભારત જોડો યાત્રા' પૂરી થશે ત્યારે આ યાત્રા શરૂ કરવામાં આવશે.