જમ્મુ-કાશ્મીર: કુલગામ બાદ કઠુઆમાં એન્કાઉન્ટર... સુરક્ષાદળોએ આતંકીઓને ઘેરી લીધા

જમ્મુ-કાશ્મીરના કુલગામ બાદ કઠુઆના બિલાવર વિસ્તારમાં સુરક્ષાદળો અને આતંકવાદીઓ વચ્ચે અથડામણ ચાલુ છે. આતંકવાદીઓની હાજરી અંગે વિશેષ બાતમીના આધારે સુરક્ષા દળોએ કઠુઆના બિલાવર ગામમાં સંયુક્ત સર્ચ ઓપરેશન શરૂ કર્યું છે.

જમ્મુ-કાશ્મીરના કુલગામ બાદ કઠુઆના બિલાવર વિસ્તારમાં સુરક્ષાદળો અને આતંકવાદીઓ વચ્ચે અથડામણ ચાલુ છે. આ ઘટનામાં જમ્મુ-કાશ્મીર પોલીસનો એક હેડ કોન્સ્ટેબલ શહીદ થયો હતો. આતંકવાદીઓની હાજરી અંગે વિશેષ બાતમીના આધારે સુરક્ષા દળોએ કઠુઆના બિલાવર ગામમાં સંયુક્ત સર્ચ ઓપરેશન શરૂ કર્યું છે. માનવામાં આવે છે કે જૈશના આતંકવાદીઓ આ વિસ્તારમાં ફસાયેલા છે. બંને તરફથી થોડા રાઉન્ડ ફાયરિંગ કરવામાં આવ્યું છે. સુરક્ષા દળો હાલ વિસ્તારને કોર્ડન કરીને સર્ચ ઓપરેશન ચલાવી રહ્યા છે.

કુલગામ એન્કાઉન્ટરમાં બે આતંકવાદીઓ માર્યા ગયા હતા અને જમ્મુ-કાશ્મીર પોલીસ અધિકારી સહિત પાંચ સુરક્ષાકર્મીઓ ઘાયલ થયા હતા. માર્યા ગયેલા બે આતંકવાદીઓ પાસેથી અનેક હથિયારો અને દારૂગોળો મળી આવ્યો છે. પોલીસના જણાવ્યા અનુસાર, અત્યાર સુધીમાં બે AK47 રાઈફલ, પાંચ મેગેઝીન, એક પિસ્તોલ અને અન્ય હથિયારો પણ મળી આવ્યા છે.

અધિકારીઓએ જણાવ્યું હતું કે સુરક્ષા દળોએ કેટલાક ઇનપુટ્સના આધારે ઘેરાબંધી અને સર્ચ ઓપરેશન શરૂ કર્યું હતું. જિલ્લાના અડીગામ ગામમાં આતંકવાદીઓની હાજરી અંગે બાતમી મળી હતી. આ પછી, સેના, પોલીસ અને સીઆરપીએફએ સંયુક્ત રીતે વિસ્તારને ઘેરી લીધો અને સર્ચ ઓપરેશન શરૂ કર્યું. તેમણે કહ્યું કે જમ્મુ અને કાશ્મીરના કઠુઆમાં કોગ (મંડલી) ગામની પરિસ્થિતિને જોતાં સુરક્ષા દળો કોઈપણ ખતરાનો સામનો કરવા માટે સતર્ક અને તૈયાર છે. સુરક્ષા દળો અને આતંકવાદીઓ વચ્ચે અથડામણ બાદ સુરક્ષા વધારી દેવામાં આવી છે. અનેક જગ્યાએ બેરીકેટ લગાવીને વાહનોનું ચેકિંગ કરવામાં આવી રહ્યું છે.