બિહાર વિધાનસભાની ચૂંટણીની તારીખ આજે થશે જાહેર

બિહાર વિધાનસભાની ચૂંટણીની તારીખને લઈ એક મોટા સમાચાર સામે આવ્યા છે. ભારતીય ચૂંટણી પંચ (ECI) આજે સાંજે 4 વાગ્યે પ્રેસ કોન્ફરન્સમાં 2025 બિહાર વિધાનસભા ચૂંટણીની તારીખો અને સમયપત્રકની સત્તાવાર જાહેરાત કરશે. બિહારમાં મતદાન બે તબક્કામાં થવાની શક્યતા છે.મુખ્ય ચૂંટણી કમિશનર જ્ઞાનેશ કુમારે સ્પષ્ટતા કરી કે આગામી વિધાનસભા ચૂંટણીઓ 22 નવેમ્બર પહેલા પૂર્ણ થશે, કારણ કે વર્તમાન કાર્યકાળ 22 નવેમ્બરના રોજ સમાપ્ત થાય છે.

ચૂંટણી પંચે 4 અને 5 ઓક્ટોબરે બિહારની મુલાકાત લીધી હતી, જ્યાં મુખ્ય ચૂંટણી કમિશનરે રાજકીય પક્ષો, અધિકારીઓ, પોલીસ અને નાગરિક સમાજ સાથે મુલાકાત કરી હતી. કાયદો અને વ્યવસ્થા, ખર્ચ દેખરેખ અને મતદાન મથક વ્યવસ્થા પર ચર્ચા કરવામાં આવી હતી. રાજકીય પક્ષોએ તબક્કાઓની સંખ્યા અંગે સૂચનો આપ્યા હતા, અને પંચે છઠ પૂજા (18-28 ઓક્ટોબર) અને દિવાળીને ધ્યાનમાં રાખીને સમયપત્રક તૈયાર કર્યું છે. ઓક્ટોબર-નવેમ્બરમાં છઠ પછી મતદાન થવાની શક્યતા છે, જે 2020 ની જેમ ઓછા તબક્કામાં થશે. દરેક બૂથ પર ફક્ત 1,200 મતદારોને મંજૂરી આપવામાં આવશે.