રક્ષા મંત્રી રાજનાથ સિંહે 28 ઈન્ફ્રા પ્રોજેક્ટનું કર્યું ઉદ્ઘાટન, સરહદી રાજ્યોમાં સૈન્ય તાકાત વધશે

રક્ષા મંત્રી રાજનાથ સિંહે મંગળવારે સેના સંબંધિત 28 ઈન્ફ્રાસ્ટ્રક્ચર પ્રોજેક્ટનું ઉદ્ઘાટન કર્યું. સંરક્ષણ પ્રધાને લશ્કરી તૈયારી અને સામાજિક-આર્થિક વિકાસને વેગ આપવા માટે લદ્દાખ, અરુણાચલ પ્રદેશ, સિક્કિમ અને જમ્મુ અને કાશ્મીરના મહત્વપૂર્ણ વિસ્તારોમાં પુલ અને રસ્તાઓ સહિત 28 માળખાકીય પ્રોજેક્ટ રાષ્ટ્રને સમર્પિત કર્યા.

રક્ષા મંત્રી રાજનાથ સિંહે અરુણાચલ પ્રદેશના અલંગ-યંકિયોંગ રોડ પર સિયોમ બ્રિજ ખાતે આયોજિત સમારોહમાં રૂ. 724 કરોડના ખર્ચે બનેલ પ્રોજેક્ટનું ઉદ્ઘાટન કર્યું હતું. થોડા દિવસો પહેલા તવાંગ સેક્ટરમાં ચીની સૈનિકો દ્વારા ઘૂસણખોરીના પ્રયાસો બાદ સરહદી રાજ્યની આ તેમની પ્રથમ મુલાકાત હતી.

મળતી માહિતી અનુસાર, પ્રોજેક્ટ્સમાં સિયોમ બ્રિજ, ત્રણ રસ્તાઓ અને અન્ય ત્રણ પ્રોજેક્ટ્સ સહિત 22 બ્રિજનો સમાવેશ થાય છે. તેમાંથી આઠ પ્રોજેક્ટ લદ્દાખમાં, પાંચ અરુણાચલ પ્રદેશમાં, ચાર જમ્મુ અને કાશ્મીરમાં, ત્રણ સિક્કિમ, પંજાબ અને ઉત્તરાખંડમાં અને બે રાજસ્થાનમાં છે.

રક્ષા મંત્રીએ કહ્યું કે તાજેતરમાં તવાંગ સેક્ટરમાં એલએસી પર આપણા બહાદુર જવાનોએ ખૂબ જ બહાદુરી અને તત્પરતાથી દુશ્મનોનો સામનો કર્યો હતો. તેમણે કહ્યું કે આ શક્ય બન્યું છે કારણ કે પ્રદેશમાં પર્યાપ્ત ઈન્ફ્રાસ્ટ્રક્ચર છે. તેમણે કહ્યું કે આનાથી અમને વધુ દૂરના વિસ્તારોમાં કામ કરવાની પ્રેરણા મળે છે.