હવે, ઠાકરે અને શિંદે જૂથ શિવસેનાના ચૂંટણી ચિન્હનો ઉપયોગ નહીં કરી શકે, વાંચો બન્ને પાસે શું છે વિકલ્પ..!

ચૂંટણી પંચે શનિવારે ઉદ્ધવ ઠાકરે અને એકનાથ શિંદેની આગેવાની હેઠળના શિવસેના જૂથોને અંધેરી પૂર્વ વિધાનસભા પેટાચૂંટણીમાં પક્ષના નામ અને તેના પ્રતીકનો ઉપયોગ કરવા પર પ્રતિબંધ મૂક્યો હતો. શિવસેનાનું મૂળ ચૂંટણી ચિન્હ ધનુષ અને તીર છે, જેના પર બંને પક્ષો દ્વારા દાવો કરવામાં આવી રહ્યો છે.

ચૂંટણી કમિશને, વચગાળાના આદેશમાં, સંગઠનના નિયંત્રણનો દાવો કરતા બંને હરીફ જૂથોને સોમવાર, ઓક્ટોબર 10 સુધીમાં ત્રણ નામો તેમજ તેમના સંબંધિત જૂથો માટે નવા પ્રતીકના વિકલ્પો સૂચવવા જણાવ્યું છે. કમિશન પ્રસ્તુત વિકલ્પોમાંથી બંને જૂથોને નામ અને પ્રતીક ફાળવી શકે છે. હવે સવાલ એ ઊભો થાય છે કે, એકનાથ શિંદે અને ઠાકરે જૂથ કયું નવું પ્રતીક પસંદ કરશે. શિંદે જૂથની દશેરા રેલીમાં સ્ટેજ પર તલવાર મૂકવામાં આવી હતી. રેલીની શરૂઆત તલવાર પૂજનથી થઈ હતી. શિવસેનાના ધારાસભ્યએ સીએમ શિંદેને 12 ફૂટની ચાંદીની તલવાર પણ આપી હતી. જો આપણે પ્રતીકાત્મક રીતે ધારીએ કે શિંદે જૂથ તલવાર પ્રતીક મેળવવાનો પ્રયાસ કરશે, તો જવાબ એ છે કે ચૂંટણી પંચની યાદીમાં તમામ પ્રતીકોમાં તલવાર નથી. હવે ઉદ્ધવ ઠાકરે જૂથની વાત કરીએ તો, ઉદ્ધવના નજીકના સાથી મિલિંદ નાર્વેકરે આજે વાઘની તસવીર મૂકીને એક ટ્વિટ કર્યું અને તેને કેપ્શન આપ્યું-આમચન આઇકોન-ઉદ્ધવ બાળાસાહેબ ઠાકરે. અહીં એ પણ પ્રશ્ન રહે છે કે, ચૂંટણી પંચ જે ત્રણ ચૂંટણી પ્રતીકો પસંદ કરવાનો વિકલ્પ આપશે તે યાદીમાં વાઘનું પ્રતીક પણ નથી.

થોડું પાછળ જઈએ તો ખબર પડશે કે ઠાકરેની દશેરા રેલીમાં ગદાનો ઘણો ઉલ્લેખ હતો. અગાઉ, જ્યારે હનુમાન ચાલીસા વાંચવાને લઈને રાજ્યમાં વિવાદ શરૂ થયો હતો, ત્યારે ઉદ્ધવ ઠાકરેએ જાહેરાત કરી હતી કે, તેમની પાસે માત્ર શિવસેનાનું 'ધનુષબાન' (ચૂંટણીનું પ્રતીક) જ નહીં પરંતુ હનુમાનજીની ગદા પણ છે. જો આપણે આને નવા ચૂંટણી ચિહ્નની પસંદગીના સંકેત તરીકે માનીએ, તો તે ચૂંટણી પંચના ચૂંટણી પ્રતીકોની સૂચિમાં પણ નથી. આવી સ્થિતિમાં સવાલ એ થાય છે કે બંને પક્ષો કયું ચૂંટણી ચિન્હ લેવા ઈચ્છશે? શિંદે જૂથ કે ઠાકરે જૂથ બંને પક્ષના નામ અને ચૂંટણી ચિન્હનો ઉપયોગ કરી શકશે નહીં. તેના પર આજે શરદ પવારે કહ્યું છે કે, જ્યારે કોંગ્રેસ તૂટી હતી ત્યારે ઈન્દિરા ગાંધી જૂથે 'કોંગ્રેસ ઈન્દિરા' નામ પસંદ કર્યું હતું. તેવી જ રીતે 'શિવસેના બાળાસાહેબ ઠાકરે' નામનો વિકલ્પ બની શકે છે. પરંતુ અહીં પણ પેંચ એ છે કે બંને જૂથો આ નામ લેવાનો પ્રયાસ કરી રહ્યા છે. આવી સ્થિતિમાં ચૂંટણી પંચ સમક્ષ ફરી એક જટિલ પ્રશ્ન ઉભો થશે. આવી સ્થિતિમાં ચૂંટણી પંચ આવા નામો સૂચવી શકે છે - શિવસેના ઠાકરે, શિવસેના શિંદે. પરંતુ શિંદે જૂથ શિવસેના બાળાસાહેબ ઠાકરે પર પોતાનો દાવો છોડી દે અને શિંદે નામ માટે સંમત થાય તેવી શક્યતા ઓછી છે. આવી સ્થિતિમાં મુશ્કેલીઓ હજુ વધુ છે. ચૂંટણી પંચે શિવસેનાના ચિન્હ પર પ્રતિબંધ મૂક્યા બાદ બંને પક્ષો વચ્ચે ખળભળાટ મચી ગયો છે. આ અંગે ઉદ્ધવ ઠાકરે 9 ઓક્ટોબર, રવિવારે માતોશ્રીમાં તેમના નેતાઓ સાથે બેઠક કરશે. તે જ સમયે, એકનાથ શિંદે સાંજે 7 વાગ્યે વર્ષા બંગલામાં તેમના જૂથના મંત્રીઓ અને સાંસદો સાથે બેઠક કરશે. કહેવામાં આવી રહ્યું છે કે બંને જૂથોમાં આગળની રણનીતિ તૈયાર કરવાની સાથે નવા નામ અને પ્રતીક પર પણ ચર્ચા કરવામાં આવશે. જણાવી દઈએ કે એકનાથ શિંદેએ કોંગ્રેસ અને એનસીપી સાથે ગઠબંધન કરવા બદલ ઠાકરે વિરુદ્ધ બળવાનું બ્યુગલ વગાડ્યું હતું. શિવસેનાના 55 માંથી 40 થી વધુ ધારાસભ્યોએ શિંદેને સમર્થન આપ્યું હતું, જેના કારણે ઠાકરેને મહારાષ્ટ્રના મુખ્ય પ્રધાન તરીકે રાજીનામું આપવાની ફરજ પડી હતી. ઠાકરે જૂથથી અલગ થયા પછી, શિંદેએ ભારતીય જનતા પાર્ટી (બીજેપી) સાથે બળવાખોર ધારાસભ્યોની મદદથી સરકારની રચના કરી. આ સરકારમાં એકનાથ શિંદેને સીએમ અને દેવેન્દ્ર ફડણવીસને ડેપ્યુટી સીએમ બનાવવામાં આવ્યા હતા. મહારાષ્ટ્રમાં સત્તા પરિવર્તન પછી પણ રાજકીય મડાગાંઠ સમાપ્ત થઈ નથી. શિંદે જૂથ પોતાને વાસ્તવિક શિવસેના હોવાનો દાવો કરે છે અને તેના પક્ષના પ્રતીક ધનુષ-તીરનો દાવો કરે છે.