OYOના ફાઉન્ડર રિતેશ અગ્રવાલના પિતાનું નિધન, 20મા માળેથી પટકાતા મોત

OYO રૂમ્સના સ્થાપક રિતેશ અગ્રવાલના પિતા રમેશ અગ્રવાલનું શુક્રવારે તેમના એપાર્ટમેન્ટના 20મા માળેથી પડી જવાથી મોત થયું હતું. પોલીસ રમેશ અગ્રવાલની આત્મહત્યાની શક્યતાને પણ નકારી રહી નથી. મામલાની ઉંડાણપૂર્વક તપાસ કરવામાં આવી રહી છે. બપોરે 1 વાગ્યાની આસપાસ બનેલી આ ઘટના બાદ પોલીસે મૃતદેહનું પોસ્ટમોર્ટમ કરાવ્યું હતું. આ પછી મૃતદેહ પરિજનોને સોંપવામાં આવ્યો હતો. રિતેશ અગ્રવાલના લગ્ન ગીતાંશા સૂદ સાથે 7 માર્ચ 2023ના રોજ થયા હતા.

રમેશ અગ્રવાલ તેની પત્ની સાથે ધ ક્રેસ્ટ કોન્ડોમિનિયમ, DLF ફેઝ-4 ખાતે રહેતા હતા. ડેપ્યુટી કમિશનર ઓફ પોલીસ (પૂર્વ) વીરેન્દ્ર વિજે જણાવ્યું કે પોલીસને શુક્રવારે માહિતી મળી હતી કે 20મા માળેથી પડીને એક વ્યક્તિનું મોત થયું છે. મૃતકની ઓળખ ઓયો રૂમના સંસ્થાપક રિતેશ અગ્રવાલના પિતા રમેશ અગ્રવાલ તરીકે થઈ છે. અકસ્માત સમયે ફ્લેટમાં રિતેશ અગ્રવાલ, તેની માતા અને તેની નવવિવાહિત પત્ની ગીતાંશા હાજર હતા.

એવું કહેવામાં આવ્યું છે કે રિતેશ અગ્રવાલ તેના પિતા સાથે આ એપાર્ટમેન્ટમાં રહેતા ન હતા. રિતેશ અગ્રવાલનો પરિવાર મૂળ ઓડિશાના રાયગડાનો છે. અહીં તેના પિતા રમેશ અગ્રવાલ સિમ કાર્ડ વેચવાની નાની દુકાન ચલાવતા હતા. 7 માર્ચે રિતેશ અગ્રવાલના લગ્નમાં દેશ અને દુનિયાની જાણીતી હસ્તીઓએ હાજરી આપી હતી. જેમાં જાપાની કંપની સોફ્ટ બેંકના ચીફ એક્ઝિક્યુટિવ ઓફિસર માસાયોશી સોન પણ પહોંચ્યા હતા. જેમની પાસેથી રિતેશ અને તેની પત્નીએ તેમના ચરણ સ્પર્શ કરીને આશીર્વાદ લીધા હતા. આ સિવાય હરિયાણાના મુખ્યમંત્રી મનોહર લાલ પણ વર-કન્યાને આશીર્વાદ આપવા પહોંચ્યા હતા.