રાહુલ ગાંધીએ સરકારી બંગલો ખાલી કર્યો, પોતે દરવાજે તાળું મારી લોકસભા સચિવાલય ચાવી સોંપી

રાહુલ ગાંધીએ શનિવારે તુઘલક રોડ લેન પરના તેમના સત્તાવાર બંગલાની ચાવી લોકસભા સચિવાલયને સોંપી. રાહુલે પોતે બંગલાના દરવાજાને તાળું માર્યું, ચાવી લોકસભા સ્ટાફને આપી, હાથ મિલાવ્યા અને માતા અને બહેન પ્રિયંકાની સાથે સોનિયા ગાંધીના 10 જનપથ ખાતેના સત્તાવાર નિવાસસ્થાન જવા રવાના થયા. હવે તેઓ ત્યાં જ હશે.

બંગલો છોડ્યા બાદ મીડિયા સાથે વાત કરતાં રાહુલ ગાંધીએ કહ્યું કે તેમને આ બંગલો 2004માં અમેઠીથી સાંસદ તરીકે ચૂંટાયા બાદ 2005માં મળ્યો હતો. ભારતના લોકોએ મને આ ઘર 19 વર્ષ માટે આપ્યું. હું તેમનો આભાર માનવા માંગુ છું. મેં સત્ય બોલવાની કિંમત ચૂકવી છે. હું સત્ય બોલવા માટે કોઈપણ કિંમત ચૂકવવા તૈયાર છું. સાથે જ પ્રિયંકા ગાંધીએ કહ્યું કે મારા ભાઈએ જે કહ્યું તે બિલકુલ સાચું છે. તેણે સરકારનું સત્ય કહ્યું, તેથી જ તેની સાથે આ બધું થઈ રહ્યું છે. પરંતુ તેઓ ખૂબ જ હિંમતવાન છે, તેઓ ડરતા નથી. અમે ગભરાશું નહીં અને અમારો સંઘર્ષ ચાલુ રાખીશું.