BCCI : T20 વર્લ્ડ કપમાં ખરાબ પ્રદર્શનની અસર! ચેતન શર્મા સહિત તમામ પસંદગીકારોને હટાવ્યા.!

BCCIએ ચેતન શર્માની આગેવાની હેઠળની પસંદગી સમિતિને હટાવી દીધી છે. તેણે રાષ્ટ્રીય પસંદગીકારના પદ માટે અરજીઓ આમંત્રિત કરી છે.બીસીસીઆઈએ તેની સત્તાવાર વેબસાઈટ પર જણાવ્યું કે પસંદગીકારોની પાંચ જગ્યાઓ ખાલી છે. ટી20 વર્લ્ડ કપમાં ટીમના ખરાબ પ્રદર્શન બાદ બોર્ડે પસંદગી સમિતિને હટાવવાનો નિર્ણય લીધો હતો. ટીમ ઈન્ડિયા સેમીફાઈનલમાં ઈંગ્લેન્ડ સામે હારી ગઈ હતી. જે બાદ ઘણા ખેલાડીઓની પસંદગીને લઈને સવાલો ઉભા થયા હતા.

બીસીસીઆઈના સચિવ જય શાહે કહ્યું કે નવી રાષ્ટ્રીય પસંદગી સમિતિ માટે ભૂતપૂર્વ ખેલાડીઓ પાસેથી અરજીઓ મંગાવવામાં આવી છે. પસંદગી સમિતિમાં પાંચ જગ્યાઓ છે. 28 નવેમ્બર સાંજે 6 વાગ્યા સુધી અરજી કરી શકાશે. શરતો અનુસાર ભૂતપૂર્વ ખેલાડીની ઉંમર 60 વર્ષથી વધુ ન હોવી જોઈએ. આ સિવાય તેણે 7 ટેસ્ટ મેચ રમી હોય અથવા 30 ફર્સ્ટ ક્લાસ મેચ રમી હોય અથવા 10 વનડે અને 20 ફર્સ્ટ ક્લાસ મેચ રમી હોય. આ સિવાય તેમણે ઓછામાં ઓછા પાંચ વર્ષ પહેલા નિવૃત્ત થવું જોઈએ. જે વ્યક્તિ BCCI સંબંધિત કોઈપણ ક્રિકેટ સમિતિના પાંચ વર્ષ સુધી સભ્ય છે તેને પસંદગી માટે લાયક ગણવામાં આવશે નહીં. અરજીઓની સ્ક્રિનિંગ પછી અરજદારોની મુલાકાત લેવામાં આવશે.