દૂધીનું શાક નહીં પરંતુ એક વાર ઘરે બનાવો દૂધીનો ઓળો

દૂધી ખાવાનું મોટાભાગના લોકોને પસંદ આવતું નથી. દૂધી ખાવાના અનેક ફાયદા હોવા છતા નાના બાળકોથી લઈ વૃદ્ધ લોકો પણ દૂધીનું શાક ખાતા નથી. તો આજે અમે દૂધીનો ઓળો ઘરે કેવી રીતે બનાવાય તેની રેસિપી જણાવીશું.

દૂધીનો ઓળો બનાવવા માટે દૂધી, પાણી, તેલ, જીરું, રાઈ, હીંગ, આદુ-મરચાં, લસણ, ટામેટા, લાલ મરચું પાઉડર, મસાલો, કોથમીર સહિતની સામગ્રીની જરુર પડશે.

દૂધીનો ઓળો બનાવવા માટે સૌથી પહેલા દૂધીને સ્વચ્છ પાણીથી ધોઈ લો. ત્યાર બાદ તેના પર તેલ લગાવી દો. ત્યારબાંદ કાંટા ચમચીથી દૂધી પર કાણા પાડી લો.

હવે દૂધીને ગેસ પર બરાબર શેકી લો. જ્યાં સુધી દૂધીની છાલ કાળી ન થઈ જાય ત્યાં સુધી બરાબર શેકી ઠંડુ થવા મુકો. ત્યારબાદ દૂધી પરની કાળી છાલને ઉતારી લો.

હવે દૂધીને બરાબર મેશ કરી લો. જો દૂધી મેશ થતી ના હોય તો મિક્સર જારમાં થોડુ પાણી ઉમેરી દૂધીને પીસી લો. હવે એક પેનમાં તેલ ગરમ કરવા મુકો. તેમાં રાઈ, જીરુ, હીંગ, ડુંગળી, આદુ-મરચા અને લસણની પેસ્ટ ઉમેરી સાંતળી લો.

તેમાં લીલા મરચા, ટામેટાની પેસ્ટ ઉમેરી સાંતળી લો. ત્યારબાદ તેમાં ડુંગળીની પ્યુરી ઉમેરી બરાબર સાંતળી લો. હવે તેમાં તમામ મસાલા અને સ્વાદ અનુસાર મીઠું ઉમેરી ગ્રેવીમાંથી તેલ છુટુ પડે ત્યાં સુધી થવા દો.

હવે ગ્રેવીમાં મેશ કરેલી દૂધી ઉમેરો. ત્યારબાદ તેમાં ગરમ મસાલો ઉમેરી મિક્સ કરો. ત્યારબાદ તેને કોથમીરથી ગાર્નિસ કરી પીરસી શકો છો.