ભારત સામેની મેચ પહેલા પાકિસ્તાનને મોટો ઝટકો, તોફાની બેટ્સમેન બહાર

પાકિસ્તાન ક્રિકેટ ટીમ માટે ચેમ્પિયન્સ ટ્રોફીની શરૂઆત સારી રહી નથી. પહેલી મેચમાં તેને ન્યુઝીલેન્ડ સામે હારનો સામનો કરવો પડ્યો હતો. આ સિવાય હવે તેમના માટે બીજા એક ખરાબ સમાચાર આવ્યા છે. ટીમના વિસ્ફોટક ઓપનિંગ બેટ્સમેન ફખર ઝમાન ઈજાના કારણે ટુર્નામેન્ટમાંથી બહાર થઈ ગયા છે.

ચેમ્પિયન્સ ટ્રોફીનો પહેલો મેચ પાકિસ્તાન અને ન્યુઝીલેન્ડ વચ્ચે રમાયો હતો જેમાં કિવી ટીમે યજમાન ટીમને એકતરફી મેચમાં હરાવ્યું હતું. ન્યુઝીલેન્ડ 60 રનથી જીત્યું હતું. આ હાર બાદ પાકિસ્તાન માટે આગામી બે મેચ ખૂબ જ મહત્વપૂર્ણ બની ગઈ છે.

પહેલી ઓવરમાં ઘાયલ

ફખર ઝમાન પહેલી જ ઓવરમાં ઘાયલ થયો હતો. ફિલ્ડિંગ કરતી વખતે તે પડી ગયો અને તેની છાતીમાં ઈજા થઈ. આ પછી તેણે આખી મેચમાં ફિલ્ડિંગ કરી ન હતી. હવે ફખરે પોતે જણાવ્યું છે કે તે ઈજાને કારણે ચેમ્પિયન્સ ટ્રોફીમાંથી બહાર થઈ ગયો છે. ફખરે સોશિયલ મીડિયા સાઇટ X પર આ માહિતી આપી.

ફખરે લખ્યું, "આટલા મોટા મંચ પર પાકિસ્તાનનું પ્રતિનિધિત્વ કરવું એ સન્માનની વાત છે. તે દરેક ક્રિકેટરનું સ્વપ્ન હોય છે. મને ઘણી વખત પાકિસ્તાનનું પ્રતિનિધિત્વ કરવાની તક મળી છે. હવે હું ચેમ્પિયન્સ ટ્રોફીમાંથી બહાર છું, પરંતુ અલ્લાહે ચોક્કસપણે બધું જ આયોજન કર્યું છે. હું તક માટે આભારી છું. હું ઘરેથી મારી ટીમને ટેકો આપીશ. આ તો ફક્ત શરૂઆત છે, વાપસી મજબૂત હશે."

તેમના સ્થાને, ઇમામ-ઉલ-હકને ટીમમાં સામેલ કરવામાં આવ્યો છે, જેમણે વર્લ્ડ કપ-2023 માં પાકિસ્તાન માટે પોતાની છેલ્લી વનડે રમી હતી.