સુરત : લૂંટ અને વાહન ચોરી કરતી ગેંગના ૩ સાગરીતો પોલીસ સકંજામાં

સુરત શહેરમાં ઘરફોડ, લૂંટ અને વાહન ચોરી કરતી ગેંગના ૩ સાગરીતોની પોલીસે ધરપકડ કરી છે. ત્રણેય આરોપીઓની પૂછપરછમાં સુરત શહેરના ઉમરા, પાંડેસરા અને ખટોદરા વિસ્તારના ગુનાઓ ઉકેલવામાં સફળતા મળી જ્યારે આરોપીઓ પાસેથી મોબાઈલ, લેપટોપ સહિત રોકડા રૂપિયા કબજે કરવામાં આવ્યા છે.

હાલમાં દિવાળીને ગણતરીના દિવસ બાકી છે, ત્યારે શહેરમાં સતત પોલીસ પેટ્રોલીંગ કરી રહી છે. તે દરમિયાન ઘરફોડ, લૂંટના આરોપીઓ અંગે બાતમી સુરત એસઓજીને મળી હતી. જેથી ઉમરા નજીક એસએમસી આવાસના ગેટ પાસે વોચ ગોઠવી હતી. એસઓજી દ્વારા સોનુ પડવી, સોનુ બિહારી અને રવિશંકર પટેલને ઝપડી પાડવામાં આવ્યા હતા.

પોલીસે ત્રણેય આરોપીઓની અટકાયત કરી તલાશી લેતા ત્રણે પાસેથી 4 મોબાઈલ ફોન, 3 લેપટોપ, 1 આઈપેડ, એક કારની ચાવી, 2 બેગ, 3 બાઈક અને રોકડા 5000 રૂપિયા સહિત 4.45 લાખનો મુદ્દામાલ મળી આવતા પોલીસ પણ ચોંકી હતી. આરોપીઓએ પૂછપરછમાં સુરત શહેરના ઉમરા, પાંડેસરા અને ખટોદરા વિસ્તારના ૭ જેટલા ગુનાઓની કબૂલાત કરી હતી.

પોલીસની પૂછપરછમાં જાણવા મળ્યું હતું કે, આરોપીઓ મોડી રાત્રે અને વહેલી સવારે પહેલા બાઈક ચોરી કરતા હતા. ત્યારબાદ બાઈક પર સોસાયટીઓમાં ફરીને જે મકાનમાં ગ્રીલ વગરની સ્લાઈડિંગ બારીઓ હોય તે મકાનને ટાર્ગેટ કરતા હતા. ત્યારબાદ બારી વડે ઘરમાં પ્રવેશી મોબાઈલ ફોન, લેપટોપ, રોકડા રૂપિયાની ચોરી કરતા હતા. જ્યારે વહેલી સવારે રોડ પર જતા રાહદારીઓને ચપ્પુ બતાની લૂંટને પણ અંજામ આપતા હતા.