• ડુમસ દરિયા કિનારાની શોભા વધારતુ નગરવન

• 4.50 હેક્ટર વિસ્તારમાં ફેલાયેલું છે આ નગરવન

• રૂપિયા1.5 કરોડના ખર્ચે તૈયાર કરવામાં આવ્યું

• 5.5 લાખથી વધુ વૃક્ષો અને જીવસૃષ્ટી પ્રવાસીઓને આકર્ષે છે

• લોકલ હેન્ડીક્રાફ્ટ બજાર પણ બન્યું સ્થાનિકો માટે રોજગારીનું કેન્દ્ર

સુરત ડુમસના દરિયા કિનારે ગુજરાતનું પ્રથમ'નગરવન'  આકાર પામ્યું છે. આ વન પ્રકૃતિ અને શહેરી જીવન વચ્ચે અનોખો સુમેળ સાધે છે. 5.5 લાખથી વધુ વૃક્ષો અને વિવિધ જીવસૃષ્ટી સાથેનો આ હરિયાળો પ્રદેશ સ્થાનિકો અને પ્રવાસીઓને આકર્ષી રહ્યો છે.

સુરત શહેરી વિસ્તારોમાં પર્યાવરણીય સંરક્ષણને પ્રોત્સાહન આપવા માટે વનવિભાગે એક નવતર પગલું ભર્યું છે. રાજ્ય અને કેન્દ્ર સરકારના સહયોગથી, સુરતમાં પ્રથમ'નગરવન' વિકસાવવામાં આવ્યું છે. ડુમસ બીચ નજીક4.50 હેક્ટર વિસ્તારમાં ફેલાયેલું આ નગરવન રૂપિયા1.5 કરોડના ખર્ચે તૈયાર કરવામાં આવ્યું છે. આ નગરવનના કારણે સુરતવાસીઓને કુદરત સાથે જોડાવા માટે એક અનોખી તક મળી છે.

ડુમસ દરિયા કિનારેમિયાવાકી પદ્ધતિનો ઉપયોગ કરીને આ નગરવન બનાવવામાં આવ્યું છે. જેમાં વિવિધ પ્રજાતિઓના5.5 લાખથી વધુ વૃક્ષો વાવવામાં આવ્યા છે. આ નગરવનમાં સાઉથ અમેરિકા અને આફ્રિકાના એક્ઝોટિક બર્ડ્સસાથે મરીન લાઈફનો પરિચય કરાવવા માટે એક્વેરિયમ પણ બનાવવામાં આવ્યું છે.

સ્થાનિક સમુદાયને રોજગારી પૂરી પાડવા માટે લોકલ હેન્ડીક્રાફ્ટ બજાર પણ બનાવાયું છે.નગરવનને સંપૂર્ણ પ્લાસ્ટિક મુક્ત વિસ્તાર તરીકે વિકસાવાયું છે.લોકોમાં આ વિસ્તારનું મહત્વ વધે અને તેની જાળવણી જાતે કરે તે માટે નગરવનમાં એન્ટ્રી ફી પણ રાખવામાં આવી છે.આ પહેલ ફક્ત મનોરંજન માટે નથી, પરંતુ શહેરી લોકોને વન અને પર્યાવરણની નજીક લાવવા એક નોંધપાત્ર પ્રયાસ પણ છે.