ગૌરક્ષા બંધ કરી દે, નહિતર જીવવું ભારે પડી જશે..! : પાકિસ્તાનથી મળી સુરત કરણી સેના પ્રમુખને ધમકી...

• સુરત કરણી સેના પ્રમુખને મળી પાકિસ્તાનથી ધમકી

• પાકિસ્તાનના નંબર પરથી આવ્યો હતો વ્હોટ્સએપ કોલ

• જાનથી મારી નાખવાની ધમકી મળતા મચ્યો ખળભળાટ

• કરણી સેનાએ કલેક્ટર કચેરી ખાતે આવેદન પત્ર આપ્યું

• સમગ્ર મામલે પોલીસ સ્ટેશનમાં જાણ કરાય : કરણી સેના

 સુરત શહેર કરણી સેનાના પ્રમુખને પાકિસ્તાનથી ફોન ઉપર ધમકી આપવામાં આવી છે. જેમાં ગૌસેવા બંધ કરો કહેવાનું જણાવતા કરણી સેનાના હોદ્દેદારોએ કલેક્ટર કચેરી ખાતે આવેદન પત્ર આપી આ મામલે પોલીસને પણ જાણ કરી હતી.

કરણી સેના સુરત શહેરના પ્રમુખ તેમજ અન્ય કાર્યકર્તાઓ ગૌરક્ષા અને સમાજ સેવાનું કામ કરતા હોય છે, જેને લઈને તેઓ સતત ચર્ચામાં પણ રહે છે. કરણી સેના અનેક વિવાદો વખતે પણ સામે આવતી હોય છે, અને પોતાનો પક્ષ મુકતી હોય છે, ત્યારે સુરત શહેર કરણી સેનાના અધ્યક્ષને ફોન ઉપર ધમકી આપવામાં આવી છે કે, ગૌસેવા બંધ કરો. આ સાથે જ જાનથી મારી નાખવાની ધમકી બાબતે પણ માહિતગાર કરવામાં આવ્યા હતા.

જેને લઈને કરણી સેનાના રાષ્ટ્રીય હોદ્દેદારો તેમજ ગુજરાતના હોદ્દેદારો દ્વારા સુરત કલેક્ટર કચેરી ખાતે પાકિસ્તાન વિરુદ્ધ ઉગ્ર સૂત્રોચાર કરી આવેદન પત્ર આપવામાં આવ્યું હતું. સમયાંતરે હિન્દુ ગૌરક્ષકો અથવા તો સનાતન ધર્મની કામગીરી કરનાર લોકોને પાકિસ્તાનથી ધમકી ભર્યા ફોન આવતા હોય છે, ત્યારે ફરી એક વખત કરણી સેનાના સુરતના પ્રમુખને પાકિસ્તાનના નંબર પરથી વ્હોટ્સએપ કોલ આવ્યો હતો, અને જાનથી મારી નાખવાની ધમકી આપવામાં આવી હતી.

ગત તા. 24 ડિસેમ્બર-2024ના રોજ અજાણ્યો વ્યક્તિ સતત ફોન કરતો હતો, અને ગૌસેવા બંધ કરી દેવા માટે ધાક-ધમકી આપતો હતો. જોકે, ધમકી મળ્યા બાદ પોલીસ સ્ટેશનમાં પણ આ મામલે જાણ કરવામાં આવી છે, અને જે નંબર પરથી કોલ આવ્યો હતો, તેની પણ માહિતી આપી દેવામાં આવી છે.