સુરત : 500-200ના દરની નકલી ચલણી નોટોના બંડલ સાથે 3 શખ્સોની ધરપકડ, 2.50 કરોડથી વધુનો મત્તામાલ જપ્ત

• નકલી ચલણી નોટ બજારમાં ફરતી થાય તે પહેલા પર્દાફાશ

• 3 આરોપી પાસેથી રૂ. 2.50 કરોડથી વધુ નકલી નોટો જપ્ત

• 500-200ની ભારતીય બચ્ચો કા બેંકની નકલી નોટ પણ જપ્ત

• અસલી નોટમાં નકલી નોટ મુકી આચરવામાં આવતી છેતરપિંડી

• મુંબઈથી બનાવટી નોટોને સુરતમાં ડિલિવરી કરાય : પોલીસ

મુંબઈથી રૂ. 2.50 કરોડથી વધુની બનાવટી ચલણી નોટો સુરતમાં ડિલિવરી કરવા આવેલા 3 શખ્સોને સારોલી પોલીસે ઝડપી પાડ્યા હતા. આ શખ્સો અસલી ચલણી નોટોના બંડલમાં નકલી નોટો મુકીને બેંક સહિત અન્ય સ્થળો પર છેતરપિંડી આચરતા હોવાનું પોલીસ તપાસમાં બહાર આવ્યું છે.

સુરતની સારોલી પોલીસને મોટી સફળતા સાંપડી છે. પોલીસના બાતમી મળી હતી કે, દત્રાત્રેય શિવાજી રોકડે, ગુલશન અજીત ગુગલે, રાહુલ બોનુ વિશ્વકર્મા નામના ઇસમો મહારાષ્ટ્રના અહેમદનગર ખાતેથી ભારતીય ચલણી નોટોના બંડલો કે, જેમાં ઉપર ભારતીય ચલણી નોટો અને અંદર ભારતીય બચ્ચો કા ખાતાની નોટોના બંડલો બનાવી બેગોમાં મુકીને નીકળ્યા છે.

આ ત્રણેય શખ્સો અંત્રોલી ગામ ત્રણ રસ્તાથી નિયોલ ચેક પોસ્ટ થઈ સુરત શહેર તરફ ચાલતા ચાલતા જનાર છે. જેથી ઓળખ છતી ન થાય તે રીતે નિયોલ ચેક પોસ્ટ ખાતે પોલીસ કાફલો વોચમાં હતો. તે દરમ્યાન ચાલતા ચાલતા આવતા ત્રણેય શખ્સોને કોર્ડન કરી પોલીસે ઝડપી પાડ્યા હતા. આરોપી દત્તાત્રેય શિવજીની પૂછપરછમાં બહાર આવ્યું હતું કે, રાહુલ મહાદેવ કાલેનો અન્ય 2 શખ્સો સાથે આશરે એકાદ અઠવાડીયા પહેલા સંપર્ક થયો હતો, અને સુરત શહેર વિસ્તારમાં મોટી મોટી માર્કેટ આવેલી હોય, જેથી રૂ. 200 અને 500ના દરની અસલ અને કપૂનવાળી નોટોના બંડલ બનાવી મહારાષ્ટ્રથી સુરત લાવવામાં આવ્યા હતા.

આ નોટોના બંડલો બેંકો તથા માર્કેટ વિસ્તારમાં લોકો પાસેથી 100, 50ના અસલ નોટોના બંડલો મેળવી 200 અને 500ના દરના બંડલો આપવા જણાવ્યુ હતું, અને જે નફો થાય તે સરખા ભાગે વેચી લેવાનું નક્કી થયું હતું.

પોલીસે ભારતીય ચલણની તથા ભારતીય બચ્ચો કા ખાતા લખેલ 200 અને 500ના દરની નકલી નોટોના બંડલ મળી રૂ. 2.50 કરોડથી વધુની મત્તાનો મુદ્દામાલ જપ્ત કર્યો છે, ત્યારે હાલ તો સારોલી પોલીસે ત્રણેય શખ્સોની ધરપકડ કરી છે, જ્યારે બનાવટી નોટો આપનાર અને સુરતમાં ડિલિવરી લેનારને વોન્ટેડ જાહેર કરી વધુ તપાસ હાથ ધરી છે.