સુરત : RTOની લિંક મારફતે લોકો સાથે છેતરપિંડી આચરનાર ઝારખંડની “જામતારા ગેંગ”ના લીડર સહિત 3 શખ્સોની ધરપકડ

• RTOની લિંક મારફતે લોકો સાથે થતી છેતરપિંડી

• છેતરપિંડી કરતાં શખ્સો પોલીસના રડારમાં આવ્યા

• જામતારા ગેંગના લીડર સહિત 3 શખ્સોની ધરપકડ

• ઝારખંડથી ઝડપાયેલા શખ્સો વિરુદ્ધ કડક કાર્યવાહી

• આરોપીઓ બેન્ક ખાતામાં પૈસા ઉપાડી લેતા : પોલીસ

સુરત શહેરમાં RTOની લિંક દ્વારા લોકો સાથે છેતરપિંડી આચરનાર જામતારા ગેંગના લીડર સહિત 3 શખ્સોની સાયબર ક્રાઇમ પોલીસે ઝારખંડથી ધરપકડ કરી કાયદેસરની કાર્યવાહી હાથ ધરી છે.

આજના ડિજિટલ યુગમાં જ્યારે દરેક જાણકારી મોબાઇલમાં મળે છે. સાઇબર ગઠિયાઓ પણ નવી-નવી તરકીબો અપનાવી લોકોને ઠગવાનો પ્રયાસ કરે છે, ત્યારે હવે, સુરતમાં RTOની લિંક દ્વારા ઠગાઈ કરવામાં આવી રહી હોવાનું સામે આવ્યું છે. સમગ્ર મામલે સુરત સાયબર સેલએ જામતારા ગેંગના લીડર સહિત 3 લોકોને ઝારખંડથી ઝડપી પાડ્યા છે. આ ભેજાબાજોએ મોબાઈલમાંથી તમામ ડેટા ડિલીટ કરી દેતા રેકેટના મૂળ સુધી પહોંચવામાં પોલીસની મુશ્કેલી વધી હતી. જોકે, ડુમસ ખાતે રહેતા એક વૃદ્ધને ગત તા. 27 ઓગસ્ટના રોજ અજાણ્યા નંબર પરથી RTO ઈ-ચલણની એપ્લિકેશન ફાઈલ આવી હતી, ત્યારે વૃદ્ધે આ એપ્લિકેશન ડાઉનલોડ કરી તેમાં નામ, જન્મ તારીખ અને બેન્કના ક્રેડિટ કાર્ડની વિગતો નાખી હતી. ત્યારબાદ પેમેન્ટ પે ઓપ્શન પર ક્લિક કરતાં જ એપ્લિકેશન બંધ થઈ ગઈ હતી. ગઠિયાઓએ વૃદ્ધ પાસે એપ ડાઉનલોડ કરાવી મોબાઈલ હેક કરી લીધો હતો, જ્યારે એપ્લિકેશન બંધ થતા જ કાર્ડમાંથી 50 હજારના 4 ટ્રાન્ઝેક્શન અને 45 હજારનું ટ્રાન્ઝેક્શન મળી રૂપિયા ખાતામાંથી ઉપાડી લીધા હતા, ત્યારે હાલ તો પોલીસે ત્રણેય આરોપીઓ વિરુદ્ધ કાયદેયસરની કાર્યવાહી હાથ ધરી છે.