સુરતમાં 6 વર્ષની માસુમ બાળકીને પાડોશીએ બિસ્કીટની લાલચ આપી પોતાના ઘરે લઈ જઈ દુષ્કર્મ આચર્યું હતું, ત્યારે આ મામલે પોલીસે હવસખોરની ધરપકડ કરી કાયદેસરની કાર્યવાહી હાથ ધરી છે.
સુરત શહેરમાં હેવાનિયતની હદ વટાવતો એક કિસ્સો સામે આવ્યો છે. જેમાં પોતાના જ દાદા-દાદી પાસે રમતી 6 વર્ષની માસુમ બાળકીને પાડોશી દ્વારા સૌપ્રથમ રમાડવામાં આવે છે, ત્યારબાદ બિસ્કીટ આપવાનું કહી તેને પોતાની સાથે લઈ જાય છે. પાડોશી હોવાને નાતે દાદા-દાદી પણ ના કહી શકતા નથી. પાડોશી સુરેશ ગોસ્વામી બાળકીને પોતાના ઘરની અંદર લઈ ગયો હતો, અને કોઈને જાણ ન થાય તેવી રીતે અંદરથી રૂમનો દરવાજો બંધ કરી દીધો હતો.
બાળકી સાથે જ્યારે નરાધમ સુરેશે દુષ્કર્મ આચર્યું ત્યારે બાળકી જોર જોરથી રોઈ અને બૂમાબૂમ કરતા પાડોશમાં રહેતી મહિલા બાળકીનો અવાજ સાંભળી સુરેશ ગોસ્વામીના ઘરનો દરવાજો ખખડાવે છે. સુરેશ જેવો જ દરવાજો ખોલે છે, ત્યારે બાળકી મહિલાની સામે જ લોહીલુહાણ હાલતમાં જોવા મળી હતી. આ દરમિયાન સુરેશ ગોસ્વામી ત્યાંથી ભાગી છુટવામાં સફળ રહ્યો હતો. બાળકીના માતા-પિતાને જાણ કરાતા તાત્કાલિક સુરતની સ્મીમેર હોસ્પિટલમાં બાળકીને લોહીલુહાણ હાલતમાં સારવાર અર્થે ખસેડવામાં આવી હતી, જ્યાં તબીબોએ બાળકીનું મેડિકલ ચેકઅપ કર્યું હતું. સમગ્ર ઘટનાના પગલે ડીંડોલી પોલીસ પણ તાત્કાલિક દોડી આવી તપાસ શરૂ કરી હતી, ત્યારે ગણતરીના કલાકોમાં જ પોલીસે હવસખોર સુરેશ ગોસ્વામીની ધરપકડ કરી કાયદેસરની કાર્યવાહી હાથ ધરી છે.