• રીઢા ગઠિયાઓની રિક્ષા ગેંગનો પોલીસે કર્યો પર્દાફાશ

• મોટા વરાછામાં ખેડૂત પાસેથી થઈ હતી રોકડની ચોરી

• રૂ. 7.50 લાખ સેરવી લેનાર 4 શખ્સો પોલીસના ઝબ્બે

• પોલીસે શખ્સો પાસેથી 5 લાખનો મુદ્દામાલ રિકવર કર્યો

• તમામ આરોપીઓ ભેસ્તાન આવાસના રહેવાસી : પોલીસ

સુરત શહેરના સીમાડા નાકાથી મોટા વરાછા સુધી રિક્ષામાં બેસીને જતા ખેડૂત પાસેથી રૂ. 7.50 લાખની રોકડની ચોરી કરનાર 4 ગઠિયાઓની પોલીસે ધરપકડ કરી કાયદેસરની કાર્યવાહી હાથ ધરી છે.

સુરત શહેરના મોટા વરાછા સ્થિત કસ્તુરી સોસાયટીમાં રહેતા 53 વર્ષીય ભગવાન પ્રેમજીભાઈ જારસાણીયા ખેતીના વ્યવસાય સાથે સંકળાયેલા છે. તેમના વતન જૂનાગઢના દુધાળા ગીર ખાતેની 11 વીઘા જમીનનો ગત તા. 19 મે-2025ના રોજ ધનશ્યામ સીસોદીયા નામની વ્યક્તિ સાથે સોદો નક્કી થયો હતો. આ જમીન વેચાણના ટોકનના રૂ. 10 લાખની રકમ લઈને તેઓ વતનથી સુરત આવી રહ્યા હતા. આ દરમ્યાન સુરતના સીમાડા નાકાથી મોટા વરાછા સ્થિત તેમના નિવાસસ્થાને જવા માટે રાત્રે રિક્ષામાં બેઠા હતા, જ્યાં રસ્તામાં રિક્ષાની પાછળની સીટમાં નાણાં ભરેલો મુક્યો હતો. રિક્ષાચાલકની સાથે ગઠિયાના સ્વાંગમાં બેઠેલા અન્ય 4 પેસેન્જરોએ ખેડૂત ભગવાનભાઈ સાથે ધક્કામુક્કી કરતા હતા, તેમને રિક્ષામાં આગળ પાછળની સીટ ઉપર બેસવાનું કહીને ખેડૂતની નજર ચૂકવીને રૂ. 2.50 લાખના 4 બંડલો ભરેલા થેલામાંથી 3 બંડલ રૂ. 7.50 લાખની રકમ કાઢી લઈ રસ્તામાં ઉતારી દઈ ફરાર થઈ ગયા હતા.

બનાવ અંગે ઉત્રાણ પોલીસે સહિત સર્વેલન્સ સ્ટાફે તપાસ હાથ ધરી હતી. જેમાં મોટા વરાછા વીઆઇપી સર્કલ પાસેથી GJ-05-CV-6559 નંબરની રિક્ષાને રસ્તા વચ્ચે આંતરી હતી, ત્યારે રિક્ષામાં બેઠેલા ઝાકીર ઉર્ફે જમાઈ ઉર્ફે બોબડા નિઝામુદ્દીન શેખ, અસ્ફાક ઉર્ફે ચાચુ બશીર શાહ, ઝાકીર ઉર્ફે ભુખા સેયદ હુસૈન અને નઈમ ઉર્ફે ભઇયા નિશાર શાહને પકડી પાડ્યા હતા. રૂ. 3.89 લાખ રોકડ તેમજ રિક્ષા અને મોબાઇલ ફોન મળી રૂ. 5 લાખનો મુદ્દામાલ જપ્ત કરી પોલીસે ચારેય શખ્સો વિરુદ્ધ કાયદેસરની કાર્યવાહી હાથ ધરી છે.