સુરત : સૂર્યા મરાઠી ગેંગના સાગરીત પર થયું ફાયરિંગ, પોલીસ દોડતી થઈ...

સુરતના ચોક બજાર વિસ્તારમાં સૂર્યા મરાઠી ગેંગના સાગરીત સફી શેખ નામના ઈસમ પર ફાયરિંગની ઘટના બની હતી. ઘટનાના પગલે પોલીસે તાત્કાલિક અલગ અલગ ટીમો બનાવી કુલ 4 આરોપીની ધરપકડ કરી હતી. જોકે, એમાંથી 3 આરોપી જુવેનાઇલ હોવાનું સામે આવ્યું છે.

સુરતના ચોક બજાર વિસ્તારમાં આવેલ રોયલ ઓટો નામની દુકાનની બહાર ફાયરિંગની ઘટના બની હતી. સફી સેખ નામનો વ્યક્તિ ત્યાં બેઠો હતો તે દરમિયાન તેના પર ફાયરિંગ થયું હતું. આ ફાયરિંગમાં સફી શેખ ઈજાગ્રસ્ત થતા તાત્કાલિક હોસ્પિટલ ખસેડવામાં આવ્યો હતો. જોકે, ફાયરિંગ કરવા આવનાર ઈસમો ત્યાંથી ફરાર થઈ ગયા હતા. ઘટનાને પગલે ચોક બજાર પોલીસે તપાસ શરૂ કરી હતી. પોલીસ દ્વારા અલગ અલગ ટીમો બનાવવામાં આવી હતી. જેમાં 4 આરોપીની ધરપકડ કરવામાં આવી હતી. જેમાંથી 3 આરોપી જુવેનાઇલ હોવાનું સામે આવ્યું છે. આરોપીઓની પૂછપરછ કરતા અંદરો અંદરનો આંતરિક ઝઘડો હોવાના કારણે સફી શેખ પર ફાયરિંગ કરવામાં આવ્યું હોવાનું તપાસમાં બહાર આવ્યું હતું. સફી શેખ નામનો આ વ્યક્તિ સૂર્યા મરાઠી ગેંગનો સાગરીત હતો, અને સૂર્યા મરાઠીની હત્યામાં પણ તેમનું નામ હોવાનું સામે આવ્યું હતું. ઘટનાના કારણે આસપાસના વિસ્તારમાં ભયનો માહોલ જોવા મળ્યો હતો. આ ફાયરિંગ ઘટનામાં જુવેનાઇલનો ઉપયોગ થયો હોવાનું સામે આવ્યું છે, ત્યારે પોલીસે આ મામલે ગંભીરતા દાખવી વધુ તપાસ હાથ ધરી છે.