સુરત : 13 વર્ષીય કિશોરી પર દુષ્કર્મ ગુજારનાર નરાધમની સારોલી પોલીસે મધ્યપ્રદેશ ખાતેથી ધરપકડ કરી...

• સારોલી વિસ્તારમાં 13 વર્ષીય કિશોરી પર દુષ્કર્મનો મામલો

• પડોશમાં રહેતા યુવકે જ કિશોરીને પ્રેમજાળમાં ફસાવી હતી

• નરાધમે આચરેલા દુષ્કર્મના કારણે બાળાને ગર્ભ રહી ગયો

• માતા-પિતાએ નરાધમ વિરુદ્ધ નોંધાવી હતી પોલીસ ફરિયાદ

• નરાધમની મધ્યપ્રદેશથી ધરપકડ કરી કાર્યવાહી હાથ ધરાય

સુરત શહેરના સારોલી વિસ્તારમાં 13 કિશોરી પર દુષ્કર્મ ગુજારનાર નરાધમની પોલીસે મધ્યપ્રદેશ ખાતેથી ધરપકડ કરી કાયદેસરની કાર્યવાહી હાથ ધરી છે. સુરત શહેરના સારોલી વિસ્તારમાં 13 વર્ષની બાળા ઉપર ડ્રાઇવરે દુષ્કર્મ ગુજાર્યુ હતું. સણીયા હેમાદ વિસ્તારમાં રહેતી 13 વર્ષની બાળાને પડોશમાં જ રહેતા 21 વર્ષીય રાધવેન્દ્રસિંગે પ્રેમજાળમાં ફસાવી હતી. જેમાં રાધવેન્દ્રસિંગે કાર અવાવરૂ જગ્યાએ પાર્ક કરીને બાળા પર દુષ્કર્મ ગુજાર્યુ હતું. એટલું જ નહીં, દુષ્કર્મના કારણે બાળાને ગર્ભ રહી ગયો હતો.

આ દરમિયાન 2 દિવસ પહેલા બાળાને પેટમાં દુ:ખાવો થતાં માતા-પિતા સારવાર માટે હોસ્પિટલ લઇ ગયા હતા, જ્યાં તબીબે બાળાને 3 માસનો ગર્ભ હોવાનું જણાવતા માતા-પિતા ચોંકી ગયા હતા. બાળાએ રાધવેન્દ્રસિંગે તેની સાથે દુષ્કર્મ આચર્યું હોવાની માતા-પિતાને હકિકત જણાવી હતી, ત્યારે આ મામલે માતા-પિતાએ નરાધમ ડ્રાઇવર વિરુદ્ધ સારોલી પોલીસ મથકમાં ફરિયાદ નોંધાવી હતી.

તો બીજી તરફ, રાઘવેન્દ્ર સિંગને સમગ્ર હકીકતની જાણ થતાં તે વતન મધ્યપ્રદેશ ભાગી છૂટ્યો હતો, જ્યારે સુરત પોલીસે દુષ્કર્મનો ગુનો નોંધી આરોપી રાધવેન્દ્રસિંગની મધ્યપ્રદેશ ખાતેથી ધરપકડ કરી કાયદેસરની કાર્યવાહી હાથ ધરી છે.