સુરેન્દ્રનગર : ખેલૈયાઓ અવનવા સ્ટેપ્સ સાથે ગરબા મેદાનોમાં લેશે હિલોળા

નવરાત્રીને ગણતરીના દિવસો બાકી છે ત્યારે ખેલૈયાઓ પણ નવરાત્રીમાં મનમૂકીને માતાજીના ગરબે રમવા થનગની રહ્યા છે ત્યારે સુરેન્દ્રનગરમાં પણ ખેલૈયાઓ માટે વિવિધ સ્ટાઇલ અને સ્ટેપ શીખવા માટે ઘર આંગણે જ ગરબા ક્લાસનું આયોજન કરવામાં આવ્યું છે. જેમાં મોટી સંખ્યામાં ખેલૈયાઓ અવનવા સ્ટેપ શીખી રહ્યા છે.

નવરાત્રી પર નવ દિવસ માતાજીની ભક્તિ સાથે સાથે ગરબે ઘુમવાનું પણ પરંપરાગત મહત્વ રહેલું છે. નાના ભૂલકાઓથી લઇ યુવતીઓ, મહિલાઓ અને યુવાનો પણ નવરાત્રીમાં ગરબે રમવા આતુર બન્યા છે. સામાન્ય રીતે સુરેન્દ્રનગરના ખેલૈયાઓ અવનવા સ્ટેપ અને ગરબાની સ્ટાઇલ શીખવા માટે અમદાવાદ અને રાજકોટ જેવા શહેરોમાં જતા હોય છે... પરંતુ સુરેન્દ્રનગર જિલ્લાના ખેલૈયાઓને શહેરમાં જ અવનવા ગરબા અને સ્ટેપ શીખવા મળે તેવા હેતુ થી શહેરના 80 ફૂટ રોડ પર આઇડિયલ ગુજરાતી ગરબા કલાસનું આયોજન કરવામાં આવ્યું છે. જેમાં ખેલૈયાઓ અવનવા ગરબાના સ્ટેપ્સ શીખી અને નવરાત્રીની તૈયારીઓ કરી રહ્યા છે.

આ વર્ષે સાલસા, છોગાળા તારા, વેસ્ટર્ન ગરબા, પાવર ગરબા સહીતના સ્ટેપ યુવાનોમાં આકર્ષણનું કેન્દ્ર બન્યા છે. તો સાથે સાથે એક તાલી, ત્રણ તાલી, દોઢિયુ, પંચિયું, પોપટીયું વગેરે સ્ટાઈલોમાં પણ અવનવા સ્ટેપ શીખી રહ્યા છે.ઝાલાવાડના ખેલૈયાઓ વધુ સારી રીતે નવરાત્રીની મજા માણી શકે તે માટે બહારગામના પ્રતિષ્ઠિત ટ્રેઈનર પણ શીખડાવવા આવે છે. આમ ઝાલાવાડના ખેલૈયાઓ પણ નવરાત્રીના પર્વ પર ગરબે રમવા આતુર છે અને તમામ તૈયારીઓ કરી ચુક્યા છે. જયારે આ પ્રકારના શહેરમાં આયોજનથી ખેલૈયાઓમાં પણ આનંદ જોવા મળ્યો હતો.