વડોદરા : મોંઘવારીના વિરોધમાં કોંગ્રેસનો ઉગ્ર દેખાવ, પોલીસે કોંગી કાર્યકરોની ટિંગાટોળી કરી

વડોદરાના માંડવી ખાતે શહેર કોંગ્રેસ દ્વારા મોંઘવારીના વિરોધમાં ઉગ્ર દેખાવો કરવામાં આવ્યો હતો. આ દરમ્યાન પોલીસ દ્વારા ટિંગાટોળી સાથે કોંગી કાર્યકરોની અટકાયત કરવામાં આવી હતી.

મહેંગાઈ મુક્ત ભારત અભિયાન અંતર્ગત મોંઘવારીના વિરોધમાં કોંગ્રેસ પક્ષ દ્વારા ઠેર ઠેર વિરોધ પ્રદર્શન કરવામાં આવી રહ્યા છે, ત્યારે વડોદરા શહેરના માંડવી ખાતે શહેર કોંગ્રેસ દ્વારા ઉગ્ર દેખાવો કરવામાં આવ્યો હતો. હાથમાં વિવિધ સૂત્રોચ્ચાર સહિતના બેનર અને પોસ્ટર લઈ રાંધણ ગેસમાં વધેલા ભાવનો વિરોધ કરાયો હતો. જેમાં રાંધણ ગેસમાં વધેલા ભાવને સરકાર દ્વારા પરત ખેંચવાની માંગ સાથે કોંગી કાર્યકર્તાઓએ ચક્કાજામ કર્યો હતો. જોકે, ટ્રાફિક જામના દ્રશ્યો સર્જાતા પોલીસે ટિંગાટોળી કરી કોંગી કોંગ્રેસ શહેર પ્રમુખ ઋત્વિજ જોશી અને વિપક્ષ નેતા અમી રાવતની અટકાયત કરી હતી. શહેર કોંગ્રેસ પ્રમુખ અને વિપક્ષ નેતાની અટકાયત થતાં કોંગ્રેસના અન્ય કાર્યકર્તાઓ પોલીસના વાહન આગળ માર્ગ પર સૂઈ જઈને વિરોધ દર્શાવ્યો હતો, ત્યારે પોલીસે વધુ 10 જેટલા કોંગી કાર્યકરોની અટકાયત કરી પોલીસ મથકે લઈ ગયા હતા.