વડોદરા : ગુજરાતમાં યોજાતા એકમાત્ર પુરુષોના ગરબા, જાણો મહિલાઓ અહી કેમ નથી ઘૂમી શકતી ગરબા..!
માંડવીમાં અંબા માતાના ચોકમાં વર્ષો જૂની પરંપરા યથાવત, 150 વર્ષ ઉપરાંતથી એકમાત્ર પુરુષો દ્વારા જ થાય છે ગરબા
નવરાત્રીના પાવન અવસરે બાળકો, મહિલાઓ અને પુરુષો સાથે મળીને ગરબે રમતા હોય છે. પરંતુ વડોદરા શહેરમાં વર્ષો જૂની એક પરંપરા અનુસાર, અંબા માતાના ચોકમાં માત્ર પુરુષો જ ગરબા રમતા આવ્યા છે, અને આજ દિન સુધી આ પરંપરા ચાલી આવી છે. જુઓ અમારો વિશેષ અહેવાલ...
વડોદરાના માંડવી ખાતે આવેલા અંબા માતાના ચોકમાં ભક્તિભાવ પૂર્વક યોજાતા એક માત્ર ગરબા એવા છે, જે ગરબી તરીકે ઓળખાય છે. અહીં માત્ર પુરુષો જ ગરબે ઘૂમે છે. 150 વર્ષ ઉપરાંતથી અંબા માતાના પ્રાચીન મંદિર ખાતે દર વર્ષે ગુજરાતમાં એકમાત્ર પુરુષોના ગરબા યોજાતા આવ્યા છે. આ મંદિરનો ઇતિહાસ વિક્રમ સંવત જેટલો જ જૂનો છે. અહીં પુરુષો જ માત્ર ગરબા કરી શકે છે. તે માત્ર પૌરાણિક પરંપરાને જાળવી રાખવા માટે આજે પણ પુરુષો ગરબા કરી રહ્યા છે. સ્ત્રીઓ ગરબીની બહાર રહી ગરબા ગાઈ શકે છે. જોકે મહિલાઓ અહી ગરબા રમી શકતી નથી.
વડોદરા શહેર વડપત્ર તરીકે જાણીતું હતું, ત્યારે અહીં રાત્રે મોડે સ્ત્રીઓને ગરબા ગાવાની પરવાનગી ન હતી. એટલે જ આ ઘળીયાળી પોળનું બંધારણ અનુસાર, અહીં ઊંચે ઝરૂખામાં બેસી સ્ત્રીઓ ગરબા જોઈ શકે તે પ્રકારની વ્યવસ્થા હતી, અને ત્યાંથી તેઓ બેસી ગરબા ગાઈ પુરુષો માતાજીના ચોકમાં માતાજીની ચૂંદડી કે, સાડી ઓઢીને માતાજીની સખી રૂપી ગરબા કરતા હતા. જોકે, આ પરંપરા આજે પણ જળવાયેલી જોવા મળી રહી છે. સાથે માતાજીના ગરબાની જ્યોત લઈ માતાજીની સામે દીવાદાંડી સ્થાપિત કરવામાં આવે છે. તેની આસપાસ પુરુષો ગરબા ગાય છે. જે દર્શાવે છે કે, માતાજી સાક્ષાત સ્થિર છે અને મનુષ્ય જીવન-મરણના ચક્રમાં તેની આસપાસ ફરતો રહે છે. અહીં શહેરના શ્રદ્ધાળુઓ રોજે રોજ ગરબા રમવા માટે આવે છે, અને ગરબાના અંતમાં લ્હાણી એટલે કે, ભેટ પણ આપવામાં આવે છે. જો તમે પણ માંડવી ખાતે માઁ અંબાના દર્શન કરવા જાવ તો એક ચક્કર ગરબાનો જરૂરથી મારજો, ધન્યતા અનુભવશો...
