ભરૂચ જિલ્લા પંચાયત હસ્તકના વમલેશ્વર-લખીગામ લુવારા હોડી ઘાટની હરાજીને લઈને વિવાદ ઊભો થયો છે. હોડી ઘાટની હરાજી માટે તંત્ર દ્વારા સૂચિત કરવામાં આવેલી શરતો સામે વમલેશ્વરના ગ્રામજનોએ વિરોધ નોંધાવ્યો છે. આ મામલે ગ્રામજનોએ કલેક્ટર અને જિલ્લા વિકાસ અધિકારીને આવેદનપત્ર પાઠવી હરાજીની શરતોમાં ફેરફાર કરવાની માંગ કરી છે.
ગ્રામજનોના આક્ષેપ મુજબ, હોડી ઘાટની હરાજી માટે નક્કી કરવામાં આવેલી શરતોને કારણે સ્થાનિક ગ્રામજનોને ઇજારો મેળવવાથી દૂર રાખવાનું કાવતરું રચવામાં આવી રહ્યું છે. સ્થાનિક લોકોને હોડી ઘાટના સંચાલન અને ઇજારામાં તક મળે તે માટે નિયમોમાં જરૂરી ફેરફાર કરવામાં આવે તેવી માંગ ઉઠાવવામાં આવી છે.
વમલેશ્વરના ગ્રામજનોએ તંત્ર સમક્ષ રજૂઆત કરતાં જણાવ્યું છે કે હરાજીની શરતો એવી હોવી જોઈએ કે સ્થાનિક લોકોને પણ તેમાં ભાગ લેવાની યોગ્ય તક મળી રહે. જો શરતોમાં સ્થાનિક લોકોના હિતોને ધ્યાનમાં લેવામાં નહીં આવે, તો તેઓ આર્થિક અને વ્યવસાયિક રીતે પ્રભાવિત થઈ શકે છે તેવી ચિંતા પણ વ્યક્ત કરવામાં આવી રહી છે.આ સમગ્ર મામલે ગ્રામજનોએ તંત્રનું ધ્યાન દોરી હરાજીની પ્રક્રિયામાં સ્થાનિકોના હિતોનું રક્ષણ કરવા અને સૂચિત નિયમોની સમીક્ષા કરવા માંગ કરી છે.
