દક્ષિણ કોરિયામાં મુશળધાર વરસાદથી 14 લોકોના મોત, 12 ગુમ

સિઓલ: દક્ષિણ કોરિયામાં ભારે વરસાદ અને પૂરને કારણે ૧૪ લોકોના મોત થયા છે અને ૧૨ લોકો ગુમ છે. તમને જણાવી દઈએ કે સતત પાંચ દિવસથી ભારે વરસાદને કારણે અહીં ભારે વિનાશ સર્જાયો છે. સેંકડો ઘરો અને દુકાનો પાણીમાં ડૂબી ગયા છે. સરકારે રવિવારે આ માહિતી આપી હતી.

દક્ષિણ કોરિયાના આંતરિક અને સુરક્ષા મંત્રાલયે જણાવ્યું હતું કે રવિવારે ત્યાં રહેતા એક વ્યક્તિનું મૃત્યુ થયું હતું જ્યારે સિઓલના ઉત્તરપૂર્વમાં આવેલા ગેપ્યોંગ શહેરમાં વરસાદને કારણે એક ઘર તૂટી પડ્યું હતું અને એક વ્યક્તિ નદીમાં વહી જતાં મૃત હાલતમાં મળી આવ્યો હતો. મંત્રાલયે જણાવ્યું હતું કે રવિવારે દક્ષિણ શહેર સાન્ચેઓંગમાં ભારે વરસાદ વચ્ચે ભૂસ્ખલન, ઘર ધરાશાયી થવા અને અચાનક પૂરને કારણે આઠ લોકો મૃત હાલતમાં મળી આવ્યા હતા જ્યારે છ અન્ય લોકો ગુમ થયા હતા.

મંત્રાલયના અહેવાલમાં જણાવાયું છે કે ગેપ્યોંગ અને દક્ષિણ શહેર ગ્વાંગજુમાં છ લોકો ગુમ છે. ગયા અઠવાડિયાની શરૂઆતમાં ડૂબી ગયેલી કારમાં ત્રણ લોકો મૃત હાલતમાં મળી આવ્યા હતા, અને ભારે વરસાદ દરમિયાન સિઓલના દક્ષિણમાં ઓસાનમાં ઓવરપાસની દિવાલ ધરાશાયી થતાં એક મુસાફરનું મોત થયું હતું, જેમાં તેની કાર કાદવ અને કોંક્રિટમાં દટાઈ ગઈ હતી. મંત્રાલયના અહેવાલ મુજબ, રવિવારે સવારે 9 વાગ્યા સુધીમાં લગભગ 3,840 લોકોને તેમના ઘર ખાલી કરવાની ફરજ પડી હતી.