પાકિસ્તાનમાં વધુ એક આતંકવાદી હુમલો : પોલીસ સ્ટેશન અને કસ્ટમ ઓફિસ બાદ બસો પર હુમલો, 2 લોકોના મોત...

પાકિસ્તાનના ડેરા ઇસ્માઇલ ખાનમાં બળવાખોરોએ યારિક પોલીસ સ્ટેશન અને કસ્ટમ ઓફિસ પર હુમલો કર્યો. આ હુમલામાં 2 અધિકારીઓ માર્યા ગયા અને અન્ય 2 લોકો ઘાયલ થયા છે.

પાકિસ્તાનના ડેરા ઇસ્માઇલ ખાનમાં હુમલાખોરોએ ઓટોમેટિક હથિયારોથી ગોળીબાર કર્યો, જેના કારણે વિસ્તારમાં ગભરાટ ફેલાયો. આ હુમલો ચીન-પાકિસ્તાન ઇકોનોમિક કોરિડોર (CPEC) રૂટ પર થયો, જે સુરક્ષા-સંવેદનશીલ વિસ્તાર છે. માહિતી અનુસાર, માર્યા ગયેલા અધિકારીઓમાં કસ્ટમ અધિકારી ઇસરાર ખાન અને પોલીસ કોન્સ્ટેબલ મોહમ્મદ બિલાલનો સમાવેશ થાય છે. ઘાયલોની ઓળખ હઝરત ઉમર અને ખયાલ મોહમ્મદ તરીકે કરવામાં આવી છે. બન્નેને જિલ્લા મુખ્યાલય હોસ્પિટલના ટ્રોમા સેન્ટરમાં દાખલ કરવામાં આવ્યા છે.

હુમલાખોરોએ એક સાથે પોલીસ સ્ટેશન અને કસ્ટમ ઓફિસ પર હુમલો કર્યો. તેમણે CPEC રૂટ પર મુસાફરી કરતી પેસેન્જર બસો પર પણ ગોળીબાર કર્યો, જેના કારણે મુસાફરોમાં ગભરાટ ફેલાયો. હુમલા દરમિયાન કસ્ટમ વાહનને આગ ચાંપી દેવામાં આવી. સુરક્ષા દળોએ તાત્કાલિક જવાબી કાર્યવાહી કરી. પોલીસ ગોળીબાર બાદ બળવાખોરો ઘટના સ્થળેથી ભાગી ગયા. ત્યારબાદ, મોટી પોલીસ ટુકડી ઘટનાસ્થળે પહોંચી અને આસપાસના વિસ્તારમાં શોધખોળ શરૂ કરવામાં આવી. આ મહિનાની શરૂઆતમાં, બળવાખોરોએ પાનિયાલાના વાંડા બુધ વિસ્તારમાં પોલીસ ટુકડી પર હુમલો કર્યો હતો. આ હુમલામાં ઓછામાં ઓછા 4 પોલીસ કર્મચારીઓ માર્યા ગયા હતા, જેમાં એક સ્ટેશન હાઉસ ઓફિસર (SHO)નો પણ સમાવેશ થાય છે. આ ઉપરાંત તા. 18 જાન્યુઆરીના રોજ, જિલ્લામાં એક લગ્ન સમારોહ દરમિયાન એક વિસ્ફોટ, જેને આત્મઘાતી હુમલો તરીકે વર્ણવવામાં આવ્યો હતો. જેમાં શાંતિ સમિતિના નેતા સહિત 5 લોકો માર્યા ગયા હતા, અને 10 અન્ય ઘાયલ થયા હતા.