પીએમ મોદી ત્રણ દેશોના પ્રવાસ માટે રવાના થયા, G7 સમિટમાં પણ હાજરી આપશે, જાણો સમગ્ર પ્રવાસની રૂપરેખા

પ્રધાનમંત્રી નરેન્દ્ર મોદી ત્રણ દેશોના પ્રવાસ માટે રવાના થયા છે. પીએમ મોદી આ પાંચ દિવસની મુલાકાતમાં પહેલા સાયપ્રસ જશે. આ પછી, તેઓ કેનેડામાં G-7 સમિટમાં હાજરી આપશે. અંતે, તેઓ ક્રોએશિયાની પણ મુલાકાત લેશે.

વિદેશ મંત્રાલયના જણાવ્યા અનુસાર, પ્રધાનમંત્રી નરેન્દ્ર મોદી 15 અને 16 જૂને સાયપ્રસમાં રહેશે. બે દાયકા પછી આ પહેલી વાર હશે જ્યારે કોઈ ભારતીય પીએમ સાયપ્રસની મુલાકાત લેશે. પીએમ મોદી સાયપ્રસના રાષ્ટ્રપતિ નિકોસ ક્રિસ્ટોડોલિડ્સના આમંત્રણ પર સાયપ્રસ જઈ રહ્યા છે.

આ પછી, પીએમ મોદી 16-17 જૂન દરમિયાન કેનેડામાં રહેશે. જ્યાં તેઓ G-7 સમિટમાં ભાગ લેશે. ત્યાં તેઓ કેનેડાના પીએમ તેમજ G-7 દેશોના અન્ય મોટા નેતાઓને મળશે. આ સતત છઠ્ઠી વખત હશે જ્યારે પીએમ મોદી G-7 સમિટમાં ભાગ લેશે.

પ્રધાનમંત્રી નરેન્દ્ર મોદી કેનેડાના પ્રધાનમંત્રી માર્ક કાર્નીના આમંત્રણ પર G-7 સમિટમાં હાજરી આપી રહ્યા છે. આ પછી, પીએમ મોદી આખરે 18 જૂને ક્રોએશિયા જશે. ખાસ વાત એ છે કે પીએમ મોદી ક્રોએશિયાની સત્તાવાર મુલાકાતે જનારા પહેલા ભારતીય પીએમ છે.

આ મુલાકાત દરમિયાન, પીએમ મોદી ક્રોએશિયાના પ્રધાનમંત્રી પ્લેનકોવિક સાથે દ્વિપક્ષીય બેઠક કરશે અને પીએમ મોદી રાષ્ટ્રપતિ જોરાન મિલાનોવિકને પણ મળશે.