Connect Gujarat
ગુજરાત

દાહોદ : નંદઘરના ભૂલકા હવે આરોગશે "પોષણ વાટિકા"નું તાજું શાકભાજી

દાહોદ : નંદઘરના ભૂલકા હવે આરોગશે પોષણ વાટિકાનું તાજું શાકભાજી
X

કેન્દ્ર સરકાર

દ્વારા મહત્વાકાંક્ષી સૂચિબદ્ધ કરવામાં આવેલા દાહોદ જિલ્લાના નંદઘર એટલે કે

આંગણવાડીમાં અભ્યાસ કરતા બાળકોને પોષણ મળી રહે તે માટે એક મહત્વપૂર્ણ પ્રોજેક્ટ

હાથ ધરવામાં આવ્યો છે. જિલ્લા પંચાયતની સંકલિત બાળ વિકાસ યોજના અંતર્ગત દાહોદ

જિલ્લાની ૩૦ આંગણવાડીમાં એસ્પીરેશનલ ડિસ્ટ્રીક્ટ અંતર્ગત પોષણ વાટિકાનું નિર્માણ

કરવામાં આવનાર છે. આ પોષણ વાટિકા એટલે કિચન ગાર્ડનિંગ.

જિલ્લા વિકાસ અધિકારી રચિત રાજે જણાવ્યું હતું કે, આંગણવાડીમાં અભ્યાસ કરતા બાળકોને તાજા અને આરોગ્યપ્રદ શાકભાજી મળી રહે તે ઉપરાંત ઉપલબ્ધ સંસાધનોનો મહત્તમ તથા કાર્યક્ષમ ઉપયોગ કરવા માટે પોષણ વાટિકાનું નિર્માણ કરવામાં આવનાર છે. પોષણ વાટિકામાં આંગણવાડીમાંથી નિકળતા સેન્દ્રીય કચરાનો ખાતર તરીકે ઉપયોગ કરવામાં આવશે.

જ્યારે, આંગણવાડીમાં વપરાયેલું પાણી કિચન ગાર્ડનને પૂરૂ પાડવામાં આવશે. નંદઘરની આસપાસ આવેલી ખુલ્લી જમીનનો પોષણ વાટિકાના નિર્માણ માટે ઉપયોગ કરવામાં આવશે. આંગણવાડીમાં પોષણ વાટિકાનો મંડપ ઉભો કરવામાં આવશે. જે રીતે ગ્રિન હાઉસ બનાવવામાં આવે છે, એ રીતે આ મંડપ નાના પાયા ઉપર ઉભો કરવામાં આવનાર છે. જેમાં પાણીની નીક, સેન્દ્રીય કચરાની પેટી, જીવંત વાડ, સૂર્યપ્રકાશ અને હવાની અવરજવર માટેની વ્યવસ્થા રહે તે રીતે પોષણ વાટિકા બનાવવામાં આવશે. પ્રાથમિક તબક્કે ધાનપુર તાલુકાની ૩, ઝાલોદ તાલુકાની ૮, સંજેલીની ત૩, દેવગઢ બારિયા તાલુકાની ૯ અને લીમખેડા તાલુકાની ૭ આંગણવાડીમાં પોષણ વાટિકા બનાવવાનું આયોજન છે.

આંગણવાડીના યશોદા માતાઓને દાહોદ ખાતે આત્મા પ્રોજેક્ટ અંતર્ગત ખેતીવાડી અધિકારી એન.વી. રાઠવા દ્વારા તાલીમ આપવામાં આવી છે. આંગણવાડીમાં રિંગણા, તૂરિયા, ટમેટા, દૂધી, મેથી, પાલક, કોથમરી, આદુ અને હળદર જેવી શાકભાજી કેવી રીતે ઉગાડવી તેની સારસંભાળ અને માવજતની તાલીમ આપવામાં આવી છે.

Next Story
Share it