શું અંકલેશ્વર નગરપાલિકાને સફાઈ સૈનિકોની સુરક્ષા અને સ્વાસ્થયની પડી નથી? જુઓ આ તસ્વીર

તાજેતરમાં જ અંકલેશ્વર નગરપાલિકા દ્વારા પ્રિમોંસુન કામગીરીના ભગ રૂપે વરસાદી કાંસ સહિતના કામો હાથ ધરવામાં આવ્યા છે. જેમાં શહેરની વિવિધ ગટરની પણ સફાઇ પણ હાથ ધરવામાં આવી હતી.

પ્રિમોન્સુન કામગીરીના ભાગ રૂપે આજે સફાઇ કર્મીઓની એક ટુકડી સવારે ગટરમાં થી ઢગલો કચરો બહાર કાઢતી હતી. ત્યારે તે જોઇ સૌને આનંદ થાય કે, હાશ ચાલો આ ચોમાસે ગટર નહીં ઉભરાય અને ગંદકી સાફ થશે જેથી રોગચાળો નહીં ફેલાય. પણ કહેવાય છે ને કે ‘હું માનવી માનવ થાઉં તોય ઘણું’. તેમ પોતાના અને પોતાના પરિવારની ચિંતા તો સૌ કોઇ કરે છે પણ આકરા તાપમાં કામ કરતા આ સફાઇ સૈનિકોના સ્વાસ્થયની ચિંતા કોઇ કે કરી છે ખરી? શું તેઓ માણસ નથી ?

આપણને રસ્તા ઉપર પસાર થતા સહેજ ધુળ ઉડે કે દુર્ગંધ આવે તો પણ મોઢા ઉપર માસ્ક કે રૂમાલ ઢાંકી દઈએ છે. પણ જરા જુઓ આ સફાઇ સૌનિકોને કે જેઓ આપણને સ્વચ્છ અને તંદુરસ્ત રાખવા માટે પોતાની જાતની ચિંતા કર્યા વિના, વિના સંકોચે કોઇ પણ સેફ્ટીના સાધનો વિના ઉતરે છે ગટરમાં અને કરે છે સફાઇ. અંકલેશ્વરના ભરૂચીનાકા વિસ્તારમાં આવેલ વરસાદી કાંસની સફાઈ કરતા સફાઈ સૈનિકો પણ આજે પાલિકાની મહેરબાનીથી કોઈ પણ સુરક્ષાના સાધનો વગર ગટર સાફ કરતા જોવા મળ્યા હતા. તેઓ પ્રજાને પડતી તકલીફો દુર કરવા પોતાના સ્વાસ્થયની ચિંતા કર્યા વિના ખંતથી કામગીરી કરી રહ્યા હતા.ત્યારે સવાલ એ થાય શું પાલિકા સત્તાધિશો આ બાબતને ધ્યાને લઈ સફાઇ સૈનિકોના સ્વાસ્થયનું ધ્યાન રાખશે કે કેમ તે તો આવનારો સમય જ બતાવશે.