અમેરિકા : ક્રિસમસ પાર્ટીમાં આગ લાગતા ત્રણ ભારતીય બાળકોના મોત

ક્રિસમસનો તહેવાર લોકો માટે નવા વર્ષની સાથે ખુશીઓની સોગાદ લાવે છે, પરંતુ તેલંગાણાના એક પરિવાર માટે ક્રિસમસ પાર્ટી પીડાદાયક ઘટના બની હતી. 24 ડિસેમ્બરના રોજ અમેરિકાના કોલિયરવિલેમાં આગ લાગવાના એક બનાવમાં ત્યાં રહેતા ત્રણ ભારતીય બાળકોના મોત થયા હતા.

મૂળ તેલંગાણાના રહેવાસી અને અમેરિકામાં અભ્યાસ માટે ગયેલ એક જ પરિવારના ત્રણ બાળકો, જેમાં એક ભાઇ અને તેની બે બહેનો સમાવેશ થાય છે. 24 ડિસેમ્બરના રોજ એક સ્થાનિક મિત્રને ત્યાં ક્રિસમસ પાર્ટી ઉજવણી માટે ગયા હતા. પાર્ટી દરમિયાન સ્થળ પર આગ લાગવાના કારણે ત્રણે બાળકોના મોત થયા હતા. તેમના સંબધીઓએ માહિતી આપી હતી કે, સાત્વિકા નાઇક (16), સુહાન નાઇક (15), અને જયા સુચિત (14) ભણતર હેતુસર અમેરિકા આવ્યા હતા, પરંતુ ક્રિસમસ પાર્ટી દરમિયાન દુર્ઘટનામાં તેમની મૃત્યુ થઇ હતી.

તેલંગણાના ગુરપ્પુ થંડા જિલ્લામાં રહેતા તેમના પિતા મહેશ નાઇક, દુખદ સમાચાર પછી અમેરિકા માટે રવાના થયા હતા. મહેશ મુજબ ત્રણે બાળકો અમેરિકામાં અભ્યાસ કરી રહ્યા હતા. તેમના અંકલ શ્રીનિવાસ નાઇક એક ગિરજાઘરમાં પાસ્ટર છે અને અહી તેઓ એક શાળા સંચાલિત કરી રહ્યા છે.