અમદાવાદ : AMTS બસના કંડક્ટર પર પૂર્વ પ્રેમિકાએ "તું મારી સાથે સંબંધ કેમ રાખતો નથી" કહી કર્યો એસિડ એટેક..!

પ્રેમ સંબંધમાં યુવતી પર એસિડ ફેંકવામાં આવે છે અને એવા બનાવ મેરઠ, દિલ્હી સહિત ઘણા રાજ્યોમાં બનાવ બન્યા છે. પણ ગુજરાતમાં ઉલટો બનાવ બન્યો છે. અમદાવાદમાં એક યુવતીએ આધેડ વયના કંડક્ટર પર એસિડ ફેંક્યું છે. આ યુવતી કંડક્ટરની પૂર્વ પ્રેમિકા હોવાનું સામે આવ્યું છે. AMTSમાં કંડકટર તરીકે ફરજ બજાવતા વ્યક્તિ પર તેની 38 વર્ષીય પૂર્વ પ્રેમિકાએ મિત્ર સાથે આવીને કેમ સંબંધ રાખતો નથી? કહીને એસિડ ફેક્યું હતું, જેના કારણે કંડકટરને શરીર પર ગંભીર ઈજા પહોંચી હતી. સમગ્ર મામલે કાલુપુર પોલીસે ગુનો નોંધી તપાસ હાથ ધરી છે.

અમદાવાદના બાપુનગરમાં રહેતા 51 વર્ષીય રાકેશ બ્રહ્મભટ્ટ AMTSમાં કંડકટર તરીકે ફરજ બજાવે છે. અત્યારે તેઓ કંટ્રોલર તરીકે ફરજ બજાવી રહ્યા છે. 5 વર્ષ અગાઉ રાકેશભાઈ બસમાં કંડકટર તરીકે ફરજ બજાવતા હતા ત્યારે 38 વર્ષીય મહેજબિન નામની યુવતી સાથે તેમને પ્રેમ થયો હતો. મહેજબિન જુહાપુરામાં આયશા મસ્જીદ પાસે આવેલા અંજુમ પાર્કની રહેવાસી છે. બંને વચ્ચે 4 વર્ષ સુધી સંબંધ રહ્યા હતા પરંતુ, એક વર્ષ અગાઉ રાકેશભાઈના પત્ની અને પરિવારના સભ્યોને જાણ થતાં તેમને પ્રેમ સંબંધ તોડી નાખ્યો હતો, જેની અદાવત રાખીને મહેજબિન ગઈકાલે સાંજે સાડા આઠ વાગ્યે મિત્ર મિત સાથે આવી અને એસિડ અટેક કર્યો હતો. અટેક બાદ બંને ફરાર થઈ ગયા હતા. જેનાથી તેમના જમણી આંખે, પીઠ તથા ગુપ્ત ભાગે દાઝ્યા હતા. આજુબાજુના લોકો તુરંત જ એકત્રિત થઈ ગયા હતા અને કંડક્ટરને સારવાર માટે તેમને હોસ્પિટલ ખસેડ્યા હતા. રાકેશભાઈએ આ સમગ્ર મામલે બંને વિરુદ્ધમાં કાલુપુર પોલીસ સ્ટેશનમાં ફરિયાદ નોધાવતા પોલીસે તપાસ હાથ ધરી છે.